У Беларусі заблакаваны сайт праекта па дэананімізацыі чыноўнікаў “Бульбаш”

26 верасня, Позірк. На падставе пастановы пракурора Магілёўскай вобласці ў Беларусі “абмежаваны доступ да інтэрнэт-рэсурсу “Бульбаш” з даменным імем bulb-ash.info”, паведамляе прэс-служба Генеральнай пракуратуры.

Адзначаецца, што такое рашэнне прынятае, бо сайт парушыў закон аб СМІ.

“На ім размяшчаліся інфармацыйныя матэрыялы, якія ўтрымлівалі заведама ілжывыя звесткі, скіраваныя на дыскрэдытацыю органаў дзяржаўнай улады і кіравання, — заяўляе наглядны орган. — У шэрагу выпадкаў інфармацыя мела відавочна негатыўную ацэнку дзеянняў службовых асоб, а таксама абразу прадстаўнікоў улады ў сувязі з выкананнем імі службовых абавязкаў. На рэсурсе размяшчаліся персанальныя даныя службовых асоб дзяржаўных органаў, у тым ліку пракурорскіх работнікаў”.

На згаданым сайце пазначана, што гэта “грамадскі праект супраціву, які фіксуе ў гісторыі імёны памагатых дыктатуры Лукашэнкі”. На ім апублікаваныя фатаграфіі і асабістыя звесткі суддзяў, сілавікоў, прадстаўнікоў бюджэтных арганізацый ды інш.

Паводле даных ICANN, даменнае імя зарэгістраванае 15 верасня 2025 года.