У спіс “экстрэмістаў” дададзена 17 чалавек

26 чэрвеня, Позірк. 17 чалавек унесла МУС 26 чэрвеня ў спіс асоб, якія маюць дачыненне да “экстрэмісцкай дзейнасці”. Цяпер у адпаведным пераліку на сайце ведамства 6.745 пазіцый.

11 чалавек унесена ў пералік з адзнакай “адбывае пакаранне”. Сярод іх былы дырэктар алімпійскага цэнтра па фрыстайле Вадзім Крывашэеў, які раней папоўніў спіс “тэрарыстаў” і быў асуджаны завочна да 12 гадоў пазбаўлення волі. Падставай для ўключэння яго ў “экстрэмісцкі” спіс стала наяўнасць у прысудзе артыкулаў 426, 361¹, 361 і 357 Крымінальнага кодэкса.

Таксама адбываюць пакаранне Вольга Сідарава, Леанід Паўлюкоў і Аляксей Ракевіч (усе — арт. 361⁴ КК), Яўген Сідарук і Вадзім Жыдзіс (абодва — арт. 130), Сяргей Дубінскі (арт. 130 і 361⁴), Павел Анціпенка (арт. 367, 368, 369, 369¹), Мікалай Багданчык (арт. 361⁴, 295, 368, 369), Дзмітрый Рудакоў (арт. 367) і Аксана Вальвачова (ст. 361, 368).

З пазнакай “судзімасць не пагашаная”, якая, як правіла, сведчыць аб вынясенні не звязанага з пазбаўленнем волі прысуду, у спіс “экстрэмістаў” уключаныя: Вячаслаў Гарбачоў і Раман Аляксандраў (абодва — арт. 361⁴), Алена Хулуп (арт. 361¹, 368, 361⁴), Таццяна Касценка (арт. 367), Юрый Байдук (арт. 368) і Уладзімір Кандрацюк (арт. 361¹, 368, 161⁴).

Арт. 161⁴ у Крымінальным кодэксе няма. Па ўсёй бачнасці, маецца на ўвазе арт. 361⁴.

Даведка “Позірку”:

арт. 130 Крымінальнага кодэкса — распальванне расавай, нацыянальнай, рэлігійнай альбо іншай сацыяльнай варожасці або варажнечы;

арт. 295 — незаконныя дзеянні ў дачыненні да агнястрэльнай зброі, боепрыпасаў і выбуховых рэчываў;

арт. 357 — змова ці іншыя дзеянні, учыненыя з мэтай захопу дзяржаўнай улады;

арт. 361 — заклікі да мер абмежавальнага характару (санкцый) , іншых дзеянняў, накіраваных на прычыненне шкоды нацыянальнай бяспецы Рэспублікі Беларусь;

арт. 361¹ — стварэнне экстрэмісцкага фарміравання альбо ўдзел у ім;

арт. 361⁴ — садзейнічанне экстрэмісцкай дзейнасці;

арт. 367 — паклёп у дачыненні да прэзідэнта, у тым які спыніў выкананне сваіх паўнамоцтваў;

арт. 368 — абраза прэзідэнта, у тым ліку які спыніў выкананне сваіх паўнамоцтваў;

арт. 369 — абраза прадстаўніка ўлады;

арт. 369¹ — дыскрэдытацыя Рэспублікі Беларусь;

арт. 426 — перавышэнне ўлады або службовых паўнамоцтваў.