Беларуская кампанія ProBuild Expert абвергла свой удзел у рамонтных работах на станцыі метро ў Тбілісі

3 красавіка, Позірк. Беларуская кампанія Probuild Expert не будзе займацца “непасрэдна рамонтнымі работамі” на тбіліскай станцыі метро “Варкецілі”, паведаміў выданню Newsgeorgia неназваны прадстаўнік згаданай арганізацыі.

Паводле яго слоў, кантракт Probuild Expert з мэрыяй Тбілісі прадугледжвае “толькі дэталёвае абследаванне і распрацоўку праекта на рамонт апорных канструкцый” станцыі.

Пра тое, што гэтая кампанія зоймецца завяршэннем рэканструкцыі станцыі метро “Варкецілі”, паведаміў 2 красавіка мэр грузінскай сталіцы Каха Каладзэ. Ён адзначыў, што пагадненне з арганізацыяй ужо заключанае. Сума кантракту не называлася

Каладзэ паведаміў, што гаворка ідзе аб рэканструкцыі станцыі, дзе “дах на платформе абрынуўся яшчэ ў 2018 годзе”.

“Нягледзячы на тое, што муніцыпалітэт пачаў планаваць неабходныя мерапрыемствы для аднаўлення станцыі, гэтае пытанне да гэтага часу не вырашана. Асноўнай прычынай затрымкі з’яўляецца недастатковы досвед і кваліфікацыя мясцовых праектных, будаўнічых і экспертных кампаній у сферы падземнага транспарту”, — паведаміў мэр Тбілісі, дадаўшы, што першапачаткова абраная будаўнічая кампанія “Мамісон” не выканала свае абавязацельствы, і кантракт з ёй скасаваны.

Беларускай кампаніі, падкрэсліў кіраўнік горада, трэба будзе дэмантаваць азбестацементавыя пліты на столі і сценах, а таксама мадэрнізаваць столь з выкарыстаннем бяспечных сучасных матэрыялаў у нахільным тунэлі эскалатара.

Ён адзначыў, што ўлады сталіцы разлічваюць, што рэканструкцыя завершыцца ў верасні 2025 года.

Probuild Expert — гэта каманда інжынераў з вопытам работы ў трох краінах і больш чым 2000 абследаваных аб’ектаў. На грузінскім рынку працуе з 2023 года і займаецца тэхнічнай ацэнкай стану будынкаў і збудаванняў. У яе актыве ў Грузіі, у прыватнасці, праекты санаторыяў у Ахтала, Базалеці і Баржомі.