Жыхарку Салігорска будуць судзіць за пераводы грошай палітвязням

4 красавіка, Позірк. Пракуратура Мінскай вобласці накіравала ў Мінскі абласны суд крымінальную справу ў дачыненні да 47-гадовай жыхаркі Салігорска, якой “інкрымінавана іншае садзейнічанне экстрэмісцкай дзейнасці”, паведаміла раённая дзяржгазета “Шахцёр” са спасылкай на старшага пракурора Валерыя Мядзеля.

Паводле звестак органа, “абвінавачаная ў перыяд з 27 верасня 2021 года па 12 траўня 2023 года, знаходзячыся на тэрыторыі г. Салігорска, вяла дэструктыўную дзейнасць, накіраваную, у тым ліку на штучнае нагнятанне напружанасці ў грамадстве і супрацьстаянне паміж грамадствам і дзяржавай, фарміраванне, пранікненне і распаўсюджванне”.

Сцвярджаецца, што яна “неаднаразова аказвала садзейнічанне экстрэмісцкай дзейнасці экстрэмісцкіх фарміраванняў “Dissidentby”, “Праваабарончы цэнтр “Вясна” і “Лісты Салідарнасці Беларусь 2020”, а менавіта ажыццявіла не менш як 70 грашовых пераводаў на агульную суму каля 650 рублёў у адрас пакаранняў Міністэрства ўнутраных спраў Рэспублікі Беларусь, за ўчыненне злачынстваў экстрэмісцкай накіраванасці“.

Паведамляецца, што жанчыне прад’яўлена абвінавачанне па ч.ч. 1, 2 ст. 361⁴ Крымінальнага кодэкса (садзейнічанне экстрэмісцкай дзейнасці). Яна ўзята пад варту.

Санкцыі ч. 2 гэтага артыкула прадугледжваюць абмежаванне волі на тэрмін ад двух да пяці гадоў або пазбаўленне волі на тэрмін ад трох да сямі гадоў.

8 жніўня 2024 года Брэсцкі абласны суд прыгаварыў 63-гадовую жыхарку Брэста Наталлю Малец да 3,5 года пазбаўлення волі па ч. 1 арт. 361⁴ КК.

Як паведамляў Следчы камітэт, падставай для пераследу стала “падазроная актыўнасць жанчыны ў ажыццяўленні грашовых пераводаў”. “Усяго жыхарка Брэста ажыццявіла не менш як 125 паштовых грашовых пераводаў у адрас не менш як 114 асоб на суму больш за 1,5 тыс. рублёў”, — гаварылася ў рэлізе ведамства.

Сцвярджалася, што жанчына “перакладала грошы выключна асобам, якія ўчынілі злачынствы экстрэмісцкай накіраванасці”. Акрамя гэтага, паводле матэрыялаў справы, Малец складалася ў закрытай групе ў “Фэйсбуку”, якая належыць “экстрэмісцкаму фармаванню”. Праваабаронцы не выключалі, што гаворка можа ісці пра групу “Лісты Салідарнасці Беларусь 2020”, якую ў снежні прызналі “экстрэмісцкім фарміраваннем”.

Маштабны рэйд сілавікоў па тых, хто ахвяраваў палітвязням і атрымліваў дапамогу, адбыўся летась у студзені.