Цягнікі па маршруце Асіповічы — Магілёў ідуць са спазненнем з-за дрэў, якія ўпалі на рэйкі — БЧ

6 красавіка, Позірк. З прычыны непагадзі 6 красавіка на ўчастку Асіповічы — Магілёў “адбылося падзенне дрэў на чыгуначныя шляхі”, паведамляе Беларуская чыгунка (БЧ).

“Асобныя цягнікі на гэтым напрамку ідуць з адхіленнем ад графіка руху арыентыровачна ад 20 хвілін да 1 гадзіны”, — адзначаецца ў паведамленні.

Заяўляецца аб прыняцці “аператыўных захадаў” па “ліквідацыі наступстваў непагадзі і ўводу цягнікоў у графік”.

Раней паведамлялася, што з-за непагадзі ў 272 населеных пунктах Мінскай і Магілёўскай абласцей 6 красавіка было парушана электразабеспячэнне.

Напярэдадні ў Беларусі істотна пахаладала, быў абвешчаны аранжавы ўзровень небяспекі. Па краіне прайшлі дажджы і снегапады, быў моцны вецер. Паводле прагнозаў Белгідрамета, халоднае надвор’е захаваецца ў бліжэйшыя дні.