Праваабаронцы прызналі палітвязнямі яшчэ 7 чалавек

15 красавіка, Позірк. Беларуская праваабарончая супольнасць 15 красавіка прызнала палітвязнямі яшчэ 7 чалавек, вынікае з заявы праваабарончай супольнасці.

Адпаведны статус атрымалі асуджаныя да пазбаўлення волі ў папраўчай калоніі Генадзь Іванчыкаў (2 гады), Аляксей Семянюк (1,5 года), а таксама Ігар Драбышэўскі, Наталля Белакурская, Мікалай Снытко і Аляксандр Горбель (тэрмін праваабаронцам невядомы). Таксама палітвязнем прызнаны асуджаны да абмежавання волі Дзяніс Белаголаў.

Паводле звестак праваабаронцаў, Семянюк, Белакурская, Снытка і Горбель асуджаныя паводле арт. 368 Крымінальнага кодэкса (абраза прэзідэнта). У прысудзе Белакурскай і Снытко фігуруе таксама арт. 369 (абраза прадстаўніка ўлады), Снытко — арт. 391 (абраза суддзі або народнага засядацеля).

Іванчыкаў асуджаны паводле арт. 367 (паклёп у дачыненні да прэзідэнта), Драбышэўскі — паводле арт. 361 (заклікі да захадаў абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы), Белаголаў — паводле арт. 369.

Праваабаронцы заявілі, што лічаць пераслед і пазбаўленне волі названых грамадзян палітычна матываваным, звязаным з мірнай рэалізацыяй выказвання меркавання. Яны запатрабавалі ад беларускіх уладаў неадкладна вызваліць іх, а таксама ўсіх палітычных зняволеных; спыніць рэпрэсіі; прыняць меры, накіраваныя на дэкрыміналізацыю дыфамацыйных правапарушэнняў і адмену артыкулаў Крымінальнага кодэкса, якія прадугледжваюць адказнасць за абразу дзяржавы, дзяржаўных сімвалаў і службовых асоб, спыніць усе раней узбуджаныя па гэтых артыкулах крымінальныя справы.

Заяву падпісалі праваабарончы цэнтр “Вясна“, “Прававая ініцыятыва”, Lawtrend і Respect-Protect-Fulfill.

У цяперашні час беларускія праваабарончыя арганізацыі прызнаюць палітвязнямі 1197 чалавек.