Аўтамабілем 2024 года ў Беларусі стаў кітайскі Voyah Free (дапоўнена)

15 красавіка, Позірк. Аўтамабілем 2024 года ў Беларусі названы кітайскі Voyah Free, паведаміў дырэктар “БАА-Кансалт” Дзмітрый Ярота на прэс-канферэнцыі 15 красавіка ў Мінску.

На фінальным этапе складання рэйтынгу, ініцыяванага Беларускай аўтамабільнай асацыяцыяй (БАА), разглядалася сем мадэляў, з якіх эксперты выбралі пераможцаў.

Другое месца заняў нямецкі Audi Q8, трэцяе — беларуска-кітайскі Belgee Х50.

Пераможцы ў іншых намінацыях:

• “Дызайн года” — Audi RS6 Avant;
• “Мадэль — навінка года” — Dongfeng BOX;
• “SUV года. Да 100 тыс. рублёў” — Belgee Х50;
• “Самы папулярны седан” — Belgee S50;
• “Самы папулярны SUV” — Belgee Х50;
• “Самы папулярны электракар” — Voyah Free;
• “Самы папулярны камерцыйны аўтамабіль” — GAZ Gazel Next Track;
• “Аўтамабіль года ў “Прамагралізінг” — Dongfeng Shine GS.

Тройка прызёраў у намінацыі “Аўтамабіль 2023 года” выглядала наступным чынам: Geely Monjaro, Voyah Free, Audi A6 Avant.

У 2024 годзе ўдзельнікі БАА рэалізавалі 49.626 новых легкавых аўтамабіляў — у 2,28 раза больш, чым у 2023-м (21.761), паведаміў Ярота.

Паводле слоў спікера, у 2019-м было прададзена 60.216, 2020-м — 46.098, 2021-м — 41.217, 2022-м — 14.843.

Летась на рынку было прадстаўлена 100 мадэляў легкавых аўто, што на 28,2% больш, чым у 2023-м. Зрэшты, адзначыў Ярота, “да 2022 года яшчэ далёка”. Тады, паводле слоў эксперта, на рынку было 142 мадэлі.