15 верасня, Позірк. Муж і жонка Дзмітрый і Таццяна Корсакавы, Арцём Меркель і вакалістка рок-гурта Dymna Lotva Кацярына Манкевіч унесеныя Камітэтам дзяржаўнай бяспекі ў спіс “асоб, якія маюць дачыненне да тэрарыстычнай дзейнасці”.
Пра гэта паведамляецца ў тэлеграм-канале спецслужбы.
Падставай для ўключэння Корсаковых стаў прысуд, які набыў моц, паводле ч. 4 арт. 295 (незаконныя дзеянні ў дачыненні да агнястрэльнай зброі, боепрыпасаў і выбуховых рэчываў), Меркеля — прысуд паводле арт. 293 (масавыя беспарадкі), Манкевіч — паводле арт. 2891 (прапаганда тэрарызму) і 2901 (фінансаванне тэрарыстычнай дзейнасці) Крымінальнага кодэкса.
Прыгавор па справе сям’і Корсакавых Мінскі гарадскі суд вынес 10 чэрвеня. Пелагея Корсакава, якая пражывае ва Украіне, прысуджаная завочна да 11 гадоў пазбаўлення волі. Яе бацькі — Дзмітрый і Таццяна Корсакавы — асуджаныя адпаведна на 14 і 12 гадоў зняволення. Яны знаходзяцца ў няволі. Падрабязнасці крымінальнай справы невядомыя.
Раней паведамлялася, што Дзмітрыю і Таццяне Корсакавым былі інкрымінаваныя таксама ч. 1 арт. 356 (здрада дзяржаве), і ч. 3 арт. 3331 (незаконнае перамяшчэнне праз мяжу атрутных рэчываў, агнястрэльнай зброі, боепрыпасаў, выбуховых рэчываў) КК.
Меркель і асуджаная завочна Манкевіч 11 верасня былі ўключаныя МУС у спіс “экстрэмістаў”.
Цяпер у пераліку “тэрарыстаў” 1.475 чалавек, уключаючы 723 грамадзян Беларусі.
