59-гадовы мужчына шпіталізаваны ў Мінску з нажавым раненнем пасля канфлікту ў трамваі

15 верасня, Позірк. Пра інцыдэнт у трамваі, у якім пацярпеў 59-гадовы мужчына, паведамляе ГУУС Мінгарвыканкама.

Паводле папярэдняй інфармацыі, паміж двума раней не знаёмымі мужчынамі на прыпынку грамадскага транспарту “здарылася слоўная перапалка”, якая працягнулася ў трамваі.

У ходзе канфлікту 66-гадовы мінчанін “дастаў нож і накіраваў яго ў бок апанента”, у выніку “апошняму былі нанесеныя пашкоджанні”.

Пацярпелы дастаўлены ў бальніцу.

Міліцыя праводзіць праверку па факце інцыдэнту. ДзяржСМІ са спасылкай на камітэт па ахове здароўя Мінгарвыканкама паведамляюць, што стан пацярпелага стабільны. Ён праапераваны і знаходзіцца пад кругласутачным наглядам медыкаў.