Беспілотнік, якія заляцеў з Беларусі, пераносіў выбухоўку — кіраўнік Мінабароны Літвы

15 верасня, Позірк. Беспілотнік, якія заляцеў у Літву з Беларусі і быў збіты авіяцыяй НАТО, пераносіў выбухоўку, паведаміў на сваёй старонцы ў “Фэйсбуку” міністр абароны гэтай балтыйскай дзяржавы Робертас Каўнас.

“План “Шчыт” завершаны, — адзначыў ён. — Выяўлена выбуховае прыстасаванне. Сапёры яго абясшкодзілі. Спецыялісты працягнуць вывучаць і аналізаваць беспілотнік”.

Каўнас паведаміў, што “падрабязна абмеркаваў” сітуацыю са сваім італьянскім калегам Гвіда Кразета (менавіта лётчыкі яго краіны збілі дрон). Той, паводле слоў кіраўніка літоўскага ведамства, выказаў “цвёрдую падтрымку бяспецы рэгіёну”.

“Разам мы падзякавалі экіпажу знішчальніка за прынятыя рашэнні і прадпрынятыя дзеянні”, — напісаў Каўнас.

Раней ён паведамляў, што “знішчальнікі місіі СПА НАТО знішчылі беспілотнік, які парушыў паветраную прастору Літвы”.

“Аб’ект нейтралізаваны. Дакладныя каардынаты вядомыя, сілы прыведзеныя ў гатоўнасць для забеспячэння бяспекі. Дзякую пілотам саюзнікаў, літоўскаму войску і ўсім адказным ведамствам за прафесійную і своечасовую рэакцыю”, — заявіў кіраўнік Мінабароны.

Як паведамлялася раней, неўзабаве пасля паўночы 15 верасня літоўскія вайскоўцы выявілі аб’ект, які ўвайшоў у паветраную прастору краіны. Жыхары шэрагу раёнаў Літвы, а таксама сталіцы былі папярэджаныя аб магчымасці паветранай пагрозы. З авіябазы ў Шаўляі былі паднятыя італьянскія знішчальнікі НАТО, якія збілі аб’ект. Абломкі дрона былі выяўленыя каля вёскі Праткунай у Кайшадорскім раёне.

Гэта першы выпадак знішчэння беспілотніка над Літвой.

Улады ў Мінску не папярэдзілі Вільнюс аб дроне, які ляцеў з Беларусі ў Літву, заявіў 15 верасня ў ранішнім эфіры Žinių radijas галоўны дарадца літоўскага прэзідэнта ў пытаннях нацыянальнай бяспекі Дэйвідас Матулёніс.

Адметна, што напярэдадні інцыдэнту міністр замежных спраў Літвы абмяркоўваў са спецыяльным пасланнікам прэзідэнта ЗША па Беларусі Джонам Коўлам, які прыбыў у Вільнюс і рыхтаваўся да паездкі ў Мінск, у тым ліку выклікі і пагрозы з беларускага боку.

Нацыянальны вяшчальнік LRT са спасылкай на кіраўніка Нацыянальнага цэнтра кіравання крызісамі (НЦУК) Вілмантаса Віткаўскаса паведаміў, што на месцы здарэння ўведзены план “Шчыт”, спецыялісты вывучаюць сабраныя рэшткі. “Пакуль па рэштках немагчыма вызначыць, ці быў гэта баявы дрон”, — адзначыў чыноўнік. Паводле яго слоў, высокая верагоднасць таго, што дрон быў аснашчаны выбуховай прыладай.

14 жніўня паведамлялася, што знішчальнікі місіі НАТО па патруляванні паветранай прасторы краін Балтыі збілі замежны дрон у Латвіі. 17 жніўня латвійскі міністр абароны Райвіс Мелніс заявіў, што БПЛА заляцеў на тэрыторыю краіны з Беларусі. Адзначалася, што ён трапіў у Латвію “ў выніку выкарыстання Расіяй сродкаў РЭБ”.

Са студзеня 2025 года па травень 2026-га ў краінах Балтыі сама меней 24 разы паведамлялі пра беспілотнікі, якія з’яўляліся ў паветранай прасторы або былі знойдзеныя на тэрыторыі, пісала раней “Новая газета Европа”, прааналізаваўшы паведамленні мясцовых уладаў.

Часцей за ўсё пра такія выпадкі паведамлялі ў Латвіі (не менш за 12 эпізодаў). Яшчэ як мінімум сем выпадкаў зафіксавана ў Літве, пяць — у Эстоніі.

У шэрагу выпадкаў паходжанне беспілотнікаў высветліць не атрымалася, аднак частку дронаў называлі расійскімі, украінскімі або тымі, што прыляцелі з боку Беларусі. Некаторыя інцыдэнты прыводзілі да абмежаванняў у працы інфраструктуры краін Балтыі.

Летась у ліпені расійскі ваенны беспілотнік заляцеў з тэрыторыі Беларусі ў Літву. Бытавыя БПЛА і метэазонды з кантрабанднымі тытунёвымі вырабамі залятаюць з беларускай тэрыторыі ў паветраную прастору прыгранічных краін ЕС рэгулярна.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.