У Мінску прыпыненая рэгістрацыя новых заяўнікаў у візавым цэнтры Італіі

15 верасня, Позірк. Аб часовым прыпыненні рэгістрацыі новых заяўнікаў ў спіс чакання для падачы дакументаў на візу ў Італію паведаміў 15 верасня візавы аператар VFS BY.

Дадзеная мера ўведзена ў чаканні “далейшых указанняў ад амбасады Італіі”. Разам з тым, як адзначаецца, для заяўнікаў, якія ўжо знаходзяцца ў спісе чакання, “рэгістрацыя застаецца сапраўднай”.

У кампаніі рэкамендавалі “сачыць за абнаўленнямі” на сайце і “ўстрымацца ад накіравання паўторных запытаў”, бо “такія звароты не ўплываюць на пазіцыю заяўніка ў спісе чакання і не паскараюць працэс прадастаўлення слота для запісу”.

ТАА “ВіЭфЭс”, як адзначаецца на яе сайце, з’яўляецца камерцыйнай кампаніяй, якая працуе ў партнёрстве з амбасадай Італіі, для аказання паслуг асобам, якія звяртаюцца па візу. Арганізуе працу візавых цэнтраў Італіі, дзе можна падаць запоўненую візавую анкету, неабходныя суправаджальныя дакументы і здаць біяметрычныя дадзеныя.

3 верасня паведамлялася, што Міністэрства замежных спраў Італіі правядзе праверку абставінаў выдачы шэнгенскай візы жыхару Беларусі з расійскім пашпартам, якога падазраюць у планаванні нападу на ўкраінскі транспартны самалёт у аэрапорце Лейпцыга (Германіі).

“Пройдзе расследаванне таго, што адбылося, мы ўстановім, ці так гэта і з якой прычыны была выдадзена гэтая віза”, — сказаў кіраўнік МЗС Антоніа Таяні.

2 верасня паведамлялася, што нямецкія следчыя высветлілі асобы двух падазраваных у планаваным нападзе на ўкраінскі транспартны самалёт у аэрапорце Лейпцыга, сярод іх — жыхар Беларусі.

Вядучыя нямецкія СМІ (Süddeutsche Zeitung, NDR і WDR) паведамілі пра двух падазраваных у здзяйсненні дыверсіі. Паводле інфармацыі Die Zeit, расследаванне вядзе генеральны пракурор.

Было заяўлена, што падазраваныя — ураджэнец Расіі з латвійскім пашпартам, які можа быць звязаны са спецслужбамі РФ, і жыхар Беларусі з расійскім пашпартам, які “ўжо трапляў у поле зроку паліцыі” ў розных краінах за здзяйсненне іншых правапарушэнняў.

У следчых атрымалася аднавіць маршрут яго ўезду ў Германію і выезду з яе. Паводле даных SZ, NDR і WDR, падазраваны ўехаў па італьянскай турыстычнай візе, што была выдадзеная ў Мінску напрыканцы красавіка.

Жыхар Беларусі з расійскім пашпартам, верагодна, быў выканаўцам тэракту. На яго выйшлі па слядах ДНК, пакінутых на дроне, антэне і ўнутраным баку бляшанкі з-пад выбухоўкі. Расіянін быў каардынатарам.

Абодва падазраваныя паспелі пакінуць ЕС, і следчыя скептычна ацэньваюць шанцы прыцягнуць іх да суда.

У ноч на 5 жніўня ў закрытай зоне аэрапорта Лейпцыга быў выяўлены БПЛА з зарадам выбухоўкі. Ён знаходзіўся ў непасрэднай блізкасці ад украінскіх грузавых самалётаў Ан-124 “Руслан”, якія выкарыстоўваюцца для транспарціроўкі зброі і боепрыпасаў для патрэб Сіл абароны Украіны.

Пазней высветлілася, што дронаў было мінімум тры. Адзін з іх сутыкнуўся з грузавым самалётам кампаніі DHL, а фрагменты трэцяга з 50 грамамі гексагену былі знойдзеныя 14 жніўня на полі непадалёк.

Германія, рэагуючы на інцыдэнт, абвясціла пра закрыццё апошняга генеральнага консульства РФ у Боне, а таксама пра скасаванне дамовы і закрыццё “Рускага дома” ў Берліне.

Масква традыцыйна катэгарычна адмаўляе ўсе абвінавачанні.

Дэмакратычны лідар Святлана Ціханоўская неаднаразова адзначала неабходнасць выдачы большай колькасці шэнгенскіх віз для беларусаў, аднак у Беларусі атрыманне шэнгенскай візы для звычайных людзей вельмі абмежаванае.

У 2025 годзе ў Беларусі была выдадзена 152.171 шэнгенская віза, уключаючы 129.672 шматразовыя, 221 візу з абмежаваным тэрытарыяльным дзеяннем. Гэта ў 4,2 раза менш шэнгенскіх віз, чым у 2019-м. Зафіксавана таксама 3.652 адмовы ў выдачы віз.

За 2025 год Італія выдала беларусам 50.709 шэнгенскіх віз, гэтая краіна з’яўляецца лідарам паводле колькасці выдадзеных віз. Італія выдае беларусам шэнгенскія візы пад канкрэтную паездку ў гэтую краіну. Як правіла, гаворка ідзе пра куплю тура ў Італію. Для дзелавых або сваяцкіх візітаў патрабуецца запрашэнне.