15 верасня, Позірк. Аб вынясенні 14 верасня прысуду па справе арт-прасторы “Склад бутэлек” у Барысаве (Мінская вобласць) паведаміў праваабарончы цэнтр “Вясна”.
Палітвязні Сяргей Салаш і Дзмітрый Бабіцкі прыгавораныя да пяці гадоў пазбаўлення волі з адбываннем пакарання ва ўмовах узмоцненага рэжыму. Акрамя таго, кожнаму прызначаны штраф у памеры 800 базавых велічынь (36 тыс. рублёў). Суд таксама пастанавіў спагнаць з іх “даход, атрыманы злачынным шляхам, у буйным памеры”.
Грамадскі дзеяч з Барысава Салаш быў затрыманы 12 лістапада 2025 года, у дзень прызнання арт-прасторы “экстрэмісцкім фарміраваннем” рашэннем КДБ. Раней актывіст удзельнічаў у выбарчых кампаніях, балатаваўся ў дэпутаты, збіраў подпісы за апазіцыйных кандыдатаў. У 2010-х гадах адышоў ад палітыкі, займаўся бізнесам і грамадскай дзейнасцю.
Бабіцкі, якога КДБ таксама прылічыў да ўдзельнікаў “экстрэмісцкага фарміравання”, быў затрыманы 12 снежня мінулага года.
З тых часоў абодва фігуранты знаходзіліся пад вартай.
У пачатку снежня 2025 года КДБ прызнаў ініцыятыву “Склад бутэлек” “экстрэмісцкім фарміраваннем”. Сярод асоб, якіх ведамства назвала датычнымі да яе, былі Салаш і Бабіцкі.
У арт-прасторы праходзілі канцэрты беларускіх выканаўцаў.
Прысуд Салашу і Бабіцкаму вынесены за суткі да прыезду ў Мінск спецпрадстаўніка ЗША па Беларусі Джона Коўла.
