МЗС абвінаваціў НАТО ў падрыхтоўцы ўдараў па тэрыторыі Беларусі
14 кастрычніка, Позірк. Мінск “рашуча асуджае” заявы галоўнакамандуючага Аб’яднанымі ўзброенымі сіламі НАТО ў Еўропе Алексуса Грынкевіча, які прадставіў канцэпцыю, што прадугледжвае ўдары па беларускай тэрыторыі, заявіла 14 кастрычніка Міністэрства замежных спраў.
У заяве, апублікаванай прэс-службай знешнепалітычнага ведамства, сцвярджаецца, што “так званая “Тэорыя перамогі” прадугледжвае “нанясенне прэвентыўных удараў па тэрыторыі Беларусі з ужываннем дронаў і наземных рабатызаваных сістэм”.
“Агрэсіўная рыторыка Паўночнаатлантычнага альянсу набывае ўсё больш сістэмны характар. Без якіх-небудзь пагроз з боку Беларусі, без рэальных перадумоў да канфлікту НАТО будуе планы нарошчвання вайсковай прысутнасці ля межаў і нанясення ўдараў па тэрыторыі суверэннай дзяржавы”, — адзначае МЗС.
Заяўляецца, што “пад прыкрыццём абаронных фармулёвак блок фактычна рыхтуе глебу для ваеннай эскалацыі і агрэсіі”.
“Беларусь ніколі і нікому не пагражала. Наша ваенная дактрына носіць выключна абарончы характар. Мы паслядоўна выступаем за адкрытасць, дээскалацыю і раўнапраўны дыялог”, — падкрэслівае ведамства.
МЗС заклікаў “заходніх калегаў” праявіць “здаровы глузд і прыступіць да сумеснай працы над аднаўленнем узаемнага даверу”.
Грынкевіч выступаў на Варшаўскім форуме бяспекі 12 кастрычніка. У яго выступленні згадкі пра прэвентыўныя ўдары па Беларусі не было, аднак, як пазней паведамілі многія СМІ, яна змяшчаецца ў згаданай беларускім знешнепалітычным ведамствам “Тэорыі перамогі”, якую Грынкевіч прадставіў удзельнікам форуму.
Пры гэтым магчымыя ўдары па расійскіх вайсковых аб’ектах на тэрыторыі Беларусі, а таксама Калінінградскай вобласці Расіі ў НАТО разглядаюць толькі як магчымую меру ў адказ у выпадку агрэсіўных дзеянняў з боку РФ.
24 лютага 2022 года Расія пачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Аляксандра Лукашэнкі прадаставіў арміі РФ тэрыторыю для нападу на суседнюю краіну ўзімку і ўвесну 2022 года, а затым на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лечаць расійскіх вайскоўцаў.
Паводле звестак журналістаў-расследвальнікаў, многія беларускія прадпрыемствы цяпер актыўна займаюцца вытворчасцю на карысць расійскага ВПК.
