МНС анансавала планавую праверку сістэмы апавяшчэння ў Мінскай вобласці

15 красавіка, Позірк. На тэрыторыі Мінскай вобласці 16 красавіка з 9.00 да 13.00 пройдзе планавая тэхнічная праверка сістэмы апавяшчэння насельніцтва, паведамляе Міністэрства па надзвычайных сітуацыях.

У ведамстве заклікалі захоўваць спакой. “Ніякіх дзеянняў не патрабуецца”, — гаворыцца ў паведамленні.

Як паведамляла прэс-служба Магілёўскага аблвыканкама, у рамках вучэнняў па грамадзянскай абароне 15-17 красавіка ў Магілёве правераць сістэму абвесткі. Адзначаецца, што магчыма ўключэнне гукавых сірэн і рассылка смс-паведамленняў ад МНС.

8 красавіка “тэхнічная праверка сістэмы абвесткі насельніцтва з запускам электрасірэн ” была праведзеная ў Брэсцкай вобласці. 30 студзеня і 20 сакавіка аналагічныя праверкі праводзіліся ў Гомельскай вобласці.

13 сакавіка планавая праверка сістэмы абвесткі прайшла па ўсёй Беларусі. У эфіры FM-радыёстанцый транслявалася паведамленне: “Увага! Праводзіцца тэхнічная праверка сістэмы абвесткі. Тэхнічная праверка завершана”.

Аб прычынах такіх частых праверак сістэм апавяшчэння МНС не паведамляе. Разам з тым звяртае на сябе ўвагу той факт, што за выключэннем Магілёўскай вобласці гэта адбывалася ў абласцях, якія мяжуюць з Украінай, куды рэгулярна ўрываюцца беспілотныя лятальныя апараты, якія, як мяркуецца, належаць Расіі. У Беларусі зафіксавана некалькі выпадкаў падзення дронаў на будынкі, аднак інфармацыі пра тое, што пры залёце на тэрыторыю Беларусі дронаў уключаюць сістэмы абвесткі, няма.

З пачатку поўнамаштабнай вайны РФ супраць Украіны праверкі сістэмы абвесткі сістэматычна праходзяць, напрыклад, у Літве, Польшчы, Чэхіі. Для гэтага выкарыстоўваюцца рэпрадуктары на вуліцах, праз якія перадаецца паведамленне і гучыць сірэна.