МУС заявіла аб выяўленні паляўнічых, якія незаконна збывалі зброю

16 красавіка, Позірк. Супрацоўнікамі галоўнага ўпраўлення па барацьбе з арганізаванай злачыннасцю і карупцыяй Міністэрства ўнутраных спраў у Магілёўскай вобласці ўстаноўлена група паляўнічых, якія набывалі і збывалі незарэгістраваную агнястрэльную зброю, кампаненты і боепрыпасы да яе, паведаміла МУС 16 красавіка.

Адзначаецца, што адзін з фігурантаў прадаў свайму земляку, які не мае спецыяльнага дазволу на захоўванне і набыццё боепрыпасаў, каля 60 патронаў. Распачата крымінальная справа.

Акрамя таго, у ходзе праверкі крамы паляўнічых тавараў канфіскавана амаль 400 несертыфікаваных патронаў, якія незаконна захоўваліся.

Паводле даных МУС, на дачыненне да згаданай дзейнасці праверана 15 чалавек. Па месцах іх жыхарства знойдзена 30 адзінак агнястрэльнай і халоднай зброі, больш за 7 тыс. патронаў, 11 слоікаў з порахам і тры трацілавыя шашкі.

Прызначаны экспертныя даследаванні, “дзеянням падазраваных будзе дадзена прававая ацэнка”, гаворыцца ў рэлізе.

МУС нагадала, што асобы, якія добраахвотна здалі ў органы ўнутраных спраў зброю і боепрыпасы, што незаконна захоўваюцца, вызваляюцца ад крымінальнай і адміністрацыйнай адказнасці.

У жыхароў Беларусі перыядычна знаходзяць незарэгістраваную зброю і боепрыпасы.

9 красавіка МУС паведаміла, што ў датычных да браканьерства чатырох жыхароў Барысаўскага, Чэрвеньскага, Пухавіцкага і Маладзечанскага раёнаў Мінскай вобласці ад 42 да 63 гадоў канфіскавана 13 адзінак агнястрэльнай зброі.

3 красавіка Дзяржаўны камітэт судовых экспертыз паведаміў, што рарытэтную зброю канфіскавалі супрацоўнікі міліцыі ў жыхара Краснапольскага раёна (Магілёўская вобласць).

31 студзеня МУС паведамляла аб канфіскацыі арсеналу агнястрэльнай і пнеўматычнай зброі ў 53-гадовага жыхара Мінскай вобласці.

Больш за 700 адзінак зброі пазбавіліся беларусы ў выніку асноўнага этапа аперацыі “Арсенал” 7–11 кастрычніка 2024 года. З абароту было выключана “больш за 85 адзінак” незарэгістраванай агнястрэльнай зброі і больш за 7 тыс. боепрыпасаў рознага калібру.

За дзесяць месяцаў мінулага года міліцыя забрала ў жыхароў Беларусі каля 2 тыс. адзінак зброі і больш за 60 тыс. боепрыпасаў.