На суботніку 12 красавіка сабрана 18,5 млн рублёў — Белстат

18 красавіка, Позірк. На рэспубліканскім суботніку, які адбыўся 12 красавіка, налічана для пералічэння па прызначэнні 18 млн 549,4 тыс. рублёў — на 17,1% больш, чым у 2024 годзе, паведамляе Нацыянальны статыстычны камітэт.

У мерапрыемстве, паводле сцвярджэння ведамства, узяло ўдзел 2 млн 361,1 тыс. чалавек. 20 красавіка 2024 года тагачасны віцэ-прэм’ер Пётр Пархомчык (цяпер кіраўнік Брэсцкай вобласці) заяўляў, што ў суботніку ўдзельнічала не менш за 2,4 млн чалавек.

Згодна з указам № 1, падпісаным Аляксандрам Лукашэнкам 3 студзеня, у 2025 годзе адбудзецца “не менш за два рэспубліканскія суботнікі“.

Пастанова, якая вызначае, што ўсе грашовыя сродкі, заробленыя на першым суботніку (12 красавіка), у тым ліку на працоўных месцах, пойдуць на будаўніцтва новага будынка Нацыянальнага гістарычнага музея, была падпісана прэм’ер-міністрам Аляксандрам Турчыным 1 красавіка.

Беларускае заканадаўства забараняе прымусовую працу. Тым не менш удзел у суботніку — перанятай у СССР практыцы прыцягнення грамадзян да “грамадска карыснай занятасці” без аплаты іх працы — фактычна прымусовы, прынамсі для працаўнікоў бюджэтных арганізацый. Паўсюднай стала практыка пабораў “на суботнік”.