Мінгарсуд завочна прыгаварыў да доўгіх тэрмінаў зняволення пяць кіраўнікоў падраздзяленняў і байцоў палка Каліноўскага
24 красавіка, Позірк. Мінскі гарадскі суд завочна прыгаварыў да доўгіх тэрмінаў зняволення пяць кіраўнікоў падраздзяленняў і байцоў палка Каліноўскага, вынікае з паведамлення Генеральнай пракуратуры.
“Паводле правілаў спецыяльнай вытворчасці” разгледжана крымінальная справа Ігната Кірэева, Яна Мельнікава, Анастасіі Махамет (былы парамедык палка), Арцёма Бігеля і Вячаслава Граноўскага.
Паведамляецца, што “з улікам прадстаўленых дзяржаўным абвінаваўцам доказаў” Мельнікаву, Кірэеву і Бігелю прызначанае пакаранне ў выглядзе пазбаўлення волі на 20 гадоў, Махамет — 18 гадоў з адбыццем першых пяці гадоў у турме, астатняга тэрміну — у папраўчых калоніях ва ўмовах узмоцненага і агульнага рэжыму адпаведна; Граноўскаму прызначанае пазбаўленне волі на 12 гадоў з адбываннем пакарання ў папраўчай калоніі ва ўмовах узмоцненага рэжыму.
Усім абвінавачаным “з улікам іх матэрыяльнага становішча” прызначана “дадатковае пакаранне” ў выглядзе штрафу ў памеры ад 500 да 3.500 базавых велічынь (ад 21 да 147 тыс. рублёў).
Прысуд не набыў моц, можа быць абскарджаны і апратэставаны.
Раней паведамлялася, што байцы палка абвінавачваліся паводле ч. 3 арт. 130, ч. 1 і 2 арт. 285, ч. 2 арт. 2905, ч. 1 арт. 357, ч. 3 арт. 361, ч. 1 арт. 3611 (у рэдакцыі КК ад 26 траўня 2021 года), ч. 3 арт. 3611, ч. 1 і 2 арт. 3613 (у рэдакцыі ад 20 красавіка 2016 года), ч. 1 і 2 арт. 3614 (у рэдакцыі ад 26 траўня 2021 года).
Усім, акрамя Мельнікава, інкрымінавана таксама арт. 3615 (у рэдакцыі ад 26 траўня 2021 года).
Кірэева, Махамет, Мельнікава таксама абвінавачвалі паводле арт. 3691, арт. 13 і ч. 3 арт. 289, ч. 4 арт. 309, ч. 2 арт. 367. Паводле ч. 1 арт. 368 абвінавачвалі Бігель, Махамет і Мельнікава, паводле ч. 1 арт. 377 — Граноўскага.
Генеральная пракуратура накіравала крымінальную справу па абвінавачванні пяці грамадзян Беларусі “ў здзяйсненні шэрагу экстрэмісцкіх, тэрарыстычных і іншых злачынстваў” у Мінскі гарадскі суд у лютым. Аб спецвытворчасці было абвешчана 10 снежня 2024 года.
Батальён імя Кастуся Каліноўскага быў створаны 9 сакавіка 2022 года. 26 сакавіка таго ж года ён увайшоў у склад Узброеных Сіл Украіны, а 21 траўня было абвешчана аб яго трансфармацыі ў полк.
У Беларусі па факце стварэння ПКК распачата крымінальная справа, ён прызнаны” экстрэмісцкім фарміраваннем”, любая дапамога ці намер яе надання, жаданне ўступіць у полк жорстка пераследуецца ўладамі.
25 верасня 2024 года стала вядома, што ПКК прызнаны беларускімі ўладамі “тэрарыстычнай арганізацыяй“. У адказ на гэта полк заявіў, што прызнае“ тэрарыстычнай арганізацыяй ” рэжым Лукашэнкі.
Даведка “Позірку”:
арт. 13 Крымінальнага кодэкса — падрыхтоўка да злачынства;
арт. 130 — распальванне расавай, нацыянальнай, рэлігійнай альбо іншай сацыяльнай варожасці або варажнечы;
арт. 289 — акт тэрарызму;
арт. 2902 — садзейнічанне тэрарыстычнай дзейнасці;
арт. 2904 — стварэнне арганізацыі для ажыццяўлення тэрарыстычнай дзейнасці альбо ўдзел у ёй;
арт. 309 — наўмыснае прывядзенне ў непрыдатнасць транспартнага сродку або шляхоў зносін;
арт. 357 — змова ці іншыя дзеянні, учыненыя з мэтай захопу дзяржаўнай улады;
арт. 361 — заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы;
арт. 3611 — стварэнне экстрэмісцкага фарміравання альбо ўдзел у ім;
арт. 3612 — фінансаванне экстрэмісцкай дзейнасці;
арт. 3613 — удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка альбо падрыхтоўка асоб да такога ўдзелу;
арт. 3614 — садзейнічанне экстрэмісцкай дзейнасці;
арт. 3615 — праходжанне навучання ці іншай падрыхтоўкі для ўдзелу ў экстрэмісцкай дзейнасці;
арт. 368 — абраза прэзідэнта;
арт. 3691 — дыскрэдытацыя Рэспублікі Беларусь;
арт. 377 — крадзеж, знішчэнне, пашкоджанне альбо ўтойванне дакументаў, штампаў, пячатак, крадзеж бланкаў.