Прэм’еры Беларусі і РФ другі раз за няпоўны тыдзень абмеркавалі эканоміку і інтэграцыю

28 красавіка, Позірк. Гандлёва-эканамічную супрацоўніцу, а таксама пытанні “інтэграцыйнага ўзаемадзеяння ў рамках Саюзнай дзяржавы” абмеркавалі 28 красавіка па тэлефоне прэм’ер-міністр Беларусі Аляксандр Турчын і яго расійскі калега Міхаіл Мішусцін.

Паводле інфармацыі прэс-службы Савета міністраў, размова адбылася “напярэдадні сустрэчы Аляксандра Лукашэнкі і Уладзіміра Пуціна ў Валгаградзе”.

Расійскі ўрад пра перагаворы не паведамляў.

Адметна, што 25 красавіка чыноўнікі ўжо стэлефаноўваліся, каб абмеркаваць “актуальныя пытанні расійска-беларускай гандлёва-эканамічнай супрацы, а таксама інтэграцыйнага ўзаемадзеяння ў Саюзнай дзяржаве ў развіццё дамоўленасцей, дасягнутых на перагаворах 7 красавіка 2025 года ў Маскве”.

Тады суразмоўцы, як паведамляла прэс-служба ўрада РФ, “падкрэслілі важнасць працягу сумесных праектаў у прамысловасці, энергетыцы, транспартнай інфраструктуры, лічбавай эканоміцы і іншых галінах”.

29 красавіка Лукашэнка і Пуціным возьмуць удзел у другім і заключным дні форуму Саюзнай дзяржавы “Вялікая спадчына — агульная будучыня” ў Валгаградзе. Ад афіцыйнага Мінска на мерапрыемстве будуць таксама “парламентарыі, прадстаўнікі грамадскіх арганізацый, рэктары ВНУ, дырэктары гімназій і школ, а таксама цэнтраў патрыятычнага выхавання краіны, навукоўцы, члены Моладзевага парламента пры Нацыянальным сходзе”.

“Чакаецца, што прэзідэнты Беларусі і Расіі правядуць асобную сустрэчу, падчас якой абмяркуюць актуальныя пытанні развіцця двухбаковай супрацы, сітуацыю ў рэгіёне і міжнародны парадак дня”, — заявіла прэс-служба Лукашэнкі.

Раней “Позірк” паведамляў, што беларускую парламенцкую дэлегацыю на гэтым форуме ўзначаліць старшыня Палаты прадстаўнікоў Ігар Сергеенка. Прэс-служба ніжняй палаты парламента заяўляла, што мэта мерапрыемства заключаецца ў “захаванні і абароне гістарычнай памяці пра падзеі Вялікай Айчыннай вайны”.

Адміністрацыя Валгаградскай вобласці, паводле інфармацыі мясцовага выдання “Гарадскія весці”, чакае прыбыцця парламенцкіх дэлегацый з краін Садружнасці Незалежных Дзяржаў, а таксама “дружалюбных краін Еўропы, Азіі, Лацінскай Амерыкі”. Агулам у мерапрыемстве, як заяўлена, возьме ўдзел больш за 500 парламентарыяў, якія прадстаўляюць больш за 20 краін.