“Альфа-Банк”, які трапіў пад санкцыі ЕС: На гэты момант усе карты працуюць у ранейшым рэжыме
23 кастрычніка, Позірк. Карты ўключанага 23 кастрычніка ў санкцыйны спіс Еўрасаюза ЗАТ “Альфа-Банк” (брэнд “Альфа Банк у Беларусі”) на гэты момант “працуюць у ранейшым рэжыме”, паведаміла прэс-служба фінансава-крэдытнай установы.
Паведамляецца, што кліентам — фізічным і юрыдычным асобам — даступныя ўсе фінансавыя аперацыі як у аддзяленнях банка, так і анлайн-фармаце.
“Альфа Банк сапраўды згадваецца ў новым апублікаваным пакеце санкцый ЕС. Што гэта значыць? Нашы юрысты ўжо актыўна разбіраюцца ў гэтым пытанні. Мы будзем трымаць вас у курсе ўсіх падзей і працягнем паведамляць пра ўсе змяненні сітуацыі”, — адзначыла арганізацыя.
Служба падтрымкі банка, адказваючы на пытанні кліентаў у каментарыях пад паведамленнем, папярэдзіла, што “могуць быць кропкавыя адхіленні пры аплатах картай па-за межамі Беларусі, але масавых адхіленняў няма на гэты момант”.
Супрацоўнікі арганізацыі паабяцалі адразу ж падзяліцца і адказаць на ўсе пытанні, як толькі атрымаюць “поўную інфармацыю”.
“Нашы карты працуюць. Сочым за колькасцю адхіленняў па картах, на гэты момант сітуацыя стабільная. Некаторыя банкі-эквайеры магу адхіляць аперацыі, але не масава”, — заявіла служба падтрымкі.
Як паведамляў “Позірк”, у 19-ы санкцыйны пакет ЕС супраць Расіі ўнесеныя тры беларускія банкі — згаданы “Альфа-Банк”, “Сбер Банк (Беларусь)” і “Банк ВТБ (Беларусь)” (абмежавальныя меры набудуць моц 2 снежня). Адметна, што ў новым пераліку фігуруюць яшчэ дзве беларускія фінансава-крэдытныя ўстановы — Банк “БелВЭБ”, “Белгазпрамбанк”, якія трапілі пад абмежавальныя меры сёлета ў лютым.
Беларускі “Альфа-Банк” знаходзіцца пад санкцыямі Вялікабрытаніі.
У 2022 годзе, пасля пачатку расійскай ваеннай агрэсіі ва Украіне, ЗША і ЕС увялі санкцыі ў дачыненні да расійскага “Альфа Банка”.
Тады ў беларускай дачцы заяўлялі, што “Альфа ў Беларусі — гэта асобны бізнес у складзе міжнароднага кансорцыума”, а таму ў дачыненні да яго і бізнесу ў Беларусі “якіх-небудзь абмежаванняў не ўводзілі” і што “банк працягвае выконваць усе ўзятыя на сябе абавязацельствы і аказваць фінансавыя паслугі шырокага профілю, у тым ліку валютныя пераводы па SWIFT, абслугоўванне выпушчаных банкам карт Visa і Mastercard па ўсім свеце, дзе прымаюць безнаяўную аплату”.
ЗАТ “Альфа-Банк” уваходзіць у структуру кансорцыума “Альфа-Груп” (РФ). Цяпер Банкаўскаму холдынгу АBH Holdings S.A. належыць 99,9% акцый ЗАТ “Альфа-Банк”.
ЕС уключыў у санкцыйны спіс тры арганізацыі і дваіх фізічных асоб — кіраўнікоў "Белнафтахіма" і "Гарызонта"
23 кастрычніка, Позірк. У 19-м санкцыйным пакеце Еўрапейскага саюза супраць Расіі фігуруюць дзве фізічныя асобы і тры кампаніі з Беларусі, вынікае з дакумента, апублікаванага 23 кастрычніка ў афіцыйным журнале ЕС. У спіс уключаныя старшыня "Белнафтахіма" Ілля Ікан, які, як лічаць …
