Лесавоз, з якім сутыкнуўся цягнік, не парушаў правілы дарожнага руху, сцвярджае Мінлясгас

30 красавіка, Позірк. Лесавоз, з якім увечары 30 красавіка сутыкнуўся пасажырскі цягнік, пераязджаў шляхі не на чырвоны сігнал святлафора, сцвярджае прэс-служба Міністэрства лясной гаспадаркі.

“Сёння ў Жлобінскім раёне адбылося сутыкненне цягніка з сартыментавозам (від грузавой спецтэхнікі для перавозкі лесаматэрыялаў. — “Позірк”.), — гаворыцца ў паведамленні. — Пры пераездзе чыгуначнага пуці сартыментавоз заглух, аператыўна завесці аўтамабіль не атрымалася, у гэты момант адбылося сутыкненне з цягніком”.

“Як паведамілі ў Гомельскім ДВЛГА, у момант заезду на чыгуначныя пуці святлафор яшчэ не быў чырвоным. Кіроўца сартыментавоза, які належыць Жлобінскаму лясгасу, не парушаў правілы дарожнага руху”, — заяўляе ведамства.

Раней прэс-служба Беларускай чыгункі паведаміла, што сутыкненне адбылося ў 17:55 “на чыгуначным пераездзе перагона Целуша — Чырвоны Бераг участка Асіповічы — Жлобін”. Сцвярджалася, што лесавоз, “парушыўшы правілы дарожнага руху, выехаў на чырвоны сігнал святлафора”, а светлавая і гукавая сігналізацыя былі спраўныя.

“На момант таго, што адбылося ў цягніку, знаходзілася 240 пасажыраў. Паводле аператыўнай інфармацыі ніхто з іх не пацярпеў. У выніку аварыі пашкоджаны кабіна электрацягніка, два вагоны і кантактная сетка”, — гаварылася ў паведамленні.

Рух цягнікоў на акрэсленым участку прыпынены.