9 траўня, Позірк. Сінхранізаваць дзейнасць парламенцкіх груп краін Балтыі “За дэмакратычную Беларусь” прапанавала дэмакратычны лідар Святлана Ціханоўская на сустрэчы з прадстаўнікамі такой групы ў латвійскім Сейме 9 траўня ў Рызе, паведамляе яе прэс-служба.
На думку палітыка, неабходна правесці супольную сустрэчу груп восенню ў Вільнюсе.
Ціханоўская падзякавала латвійскім дэпутатам за падтрымку беларусаў у выгнанні, “асабліва за зробленыя ў заканадаўстве выключэнні, а таксама за дапамогу палітвязням і прынцыповую пазіцыю адносна рэжыму”.
Дэмлідар заклікала ініцыяваць падпісанне мемарандума паміж Сеймам Латвіі і дэмакратычнымі сіламі Беларусі — аналагічнага таму, што існуе з Еўрапарламентам.
Таксама яна прапанова “разглядзець магчымасці прымянення” рэкамендацый ПАСЕ (“Люксембургскіх рашэнняў”) ў Латвіі для падтрымкі беларускіх уцекачоў.
“Я разумею, як цяжка трымаць Беларусь у цэнтры ўвагі. І ўсё ж вам гэта ўдаецца. Галоўнае — разумець, што беларусы — гэта не рэжым. Але і не варта класці іх у адзін кошык з расіянамі. Дзякуй, што вы гэта разумееце”, — сказала палітык.
Сустрэча апісана як першая ў рамках візіта Ціханоўскай у Латвію. Іншыя запланаваныя мерапрыемствы не ўзгадваюцца.
У 2024 годзе ПАСЕ прыняла рашэнне аб увядзенні інстытута генеральнага дакладчыка па Беларусі і ўдзеле дэлегацыі дэмакратычных сіл краіны ў сваіх сесіях. У будынку ПАСЕ працуе офіс беларускіх дэмсіл.
У чэрвені 2023 года ПАСЕ прыняла адмысловы даклад аб становішчы беларусаў за мяжой з рэкамендацыямі для парламентаў і ўрадаў аб падтрымцы іх легалізацыі і мабільнасці. Праз год была арганізаваная адмысловая практычная канферэнцыя “Люксембургскія рашэнні”, на якой былі выпрацаваныя канкрэтныя прапановы па імплементацыі рэкамендацый.
