У суд накіраваная справа мужчыны, які пакінуў сабе знойдзеныя пісталет і порах
13 траўня, Позірк. Пракуратура Івацэвіцкага раёна (Брэсцкая вобласць) накіравала ў суд крымінальную справу 47-гадовага мясцовага жыхара, якому інкрымінаванае незаконнае “набыццё, нашэнне і захоўванне агнястрэльнай зброі, у тым ліку здзейсненыя паўторна”, паведаміла 13 траўня прэс-служба Генеральнай пракуратуры.
Заяўлена, што абвінавачаны “не пазней за 7 сакавіка 2025 года знайшоў на гарышчы бацькоўскага дома сыпкае рэчыва, якое, паводле заключэння эксперта, з’яўляецца выбуховым рэчывам”. Мужчына, як сцвярджае пракуратура, “разумеючы сутнасць знойдзенага”, забраў рэчыва і перахаваў у сваім доме.
Паводле інфармацыі ведамства, некалькі гадоў таму ў Ваўкавыскім раёне (Гродзенская вобласць) мужчына, разбіраючы дом, знайшоў пісталет, які таксама схаваў у сваім жыллі. Згодна з заключэннем эксперта, гэта была самаробная зброя, прыдатная “для стральбы патронамі кальцавога ўзгарання”.
Падчас следства абвінавачаны, як сцвярджаецца, “прызнаў віну ў поўным аб’ёме і патлумачыў, што не планаваў выкарыстоўваць знойдзеныя порах і пісталет, а пакінуў іх для калекцыі”.
Дзеянні фігуранта справы кваліфікаваны паводле ч. 2 і 3 ст. 295 КК (незаконныя дзеянні ў адносінах да агнястрэльнай зброі, боепрыпасаў і выбуховых рэчываў). Мужчына знаходзіцца пад падпіскай аб нявыездзе і належных паводзінах.
Генпракуратура нагадала, што “няўлічаную зброю можна здаць у любы час у тэрытарыяльнае падраздзяленне органаў унутраных спраў”. Пры гэтым асобы, якія добраахвотна яе здалі, вызваляюцца ад крымінальнай і адміністрацыйнай адказнасці.
5 траўня Генпракуратура перадала ў суд крымінальную справу мужчыны, які “з дапамогай нявызначаных слясарных інструментаў”, а таксама 3D-прынтара вырабіў дзевяціміліметровы пісталет-кулямёт FGC9 версіі MkII.
7 траўня стала вядома, што гродзенская рэгіянальная мытня ўзбудзіла справу ў дачыненні да 42-гадовага грамадзяніна Беларусі, які спрабаваў увезці ў краіну 4 кг пораху.
