Генпракуратура накіравала ў суд крымінальную справу намесніка кіраўніка БЧ

14 траўня, Позірк. Генеральная пракуратура накіравала ў суд крымінальную справу ў дачыненні да намесніка начальніка Беларускай чыгункі (БЧ), паведамляе прэс-служба нагляднага ведамства.

Намеснік кіраўніка БЧ абвінавачваецца паводле ч. 3 арт. 430 Крымінальнага кодэкса (атрыманне хабару).

Згодна з матэрыяламі справы, фігурант атрымаў у якасці хабару сертыфікаты на набыццё бытавой тэхнікі ў суме 5,5 тыс. рублёў, гэта было узнагародай за “аказанне садзейнічання ў правядзенні тэхнічных выпрабаванняў і конкурсных працэдур пры закупцы рэек, а таксама за забеспячэнне своечасовай аплаты тавараў”.

Падкрэсліваецца, што паколькі пасада абвінавачанага ўваходзіць у кадравы рэестр Савета міністраў, яго дзеянні кваліфікаваныя як “атрыманне хабару асобай, якая займае адказнае становішча”.

Мужчына знаходзіцца пад вартай. Яго прозвішча не называецца.

3 чэрвеня 2024 года ініцыятыва “Супольнасць чыгуначнікаў Беларусі” са спасылкай на свае крыніцы паведамляла аб затрыманні за карупцыю першага намесніка начальніка БЧ Пятра Дулуба, а ў канцы ліпеня — намесніка начальніка БЧ Сяргея Сізіна і галоўнага інжынера Сяргея Навадворскага.

14 кастрычніка мінулага года ініцыятыва паведаміла аб затрыманні ў рамках арт. 430 КК начальніка службы перавозак БЧ Віталя Панюшэнкі, яго намесніка — начальніка Цэнтра кіравання перавозкамі (ЦКП) Фёдара Шуленкова, а таксама першага намесніка начальніка ЦКП — кіраўніка аператыўна-распарадчага аддзела Аляксандра Іванова.

1 красавіка прэс-служба Міністэрства ўнутраных спраў пацвердзіла затрыманне ў канцы 2024 года начальніка службы перавозак БЧ, яго намесніка, а таксама першага намесніка начальніка Цэнтра кіравання перавозкамі БЧ.

Адзначалася, што ўсе трое — падначаленыя аднаго з кіраўнікоў БЧ, якога затрымалі ўлетку мінулага года за “сістэматычнае атрыманне хабараў” на агульную суму каля 3 млн долараў.

МУС заяўляла, што “фігуранты на працягу трох гадоў сістэматычна атрымлівалі хабары ад прадстаўнікоў камерцыйных структур за спрыяльнае вырашэнне пытанняў аб выдзяленні высокаліквіднага інвентарнага чыгуначнага парку”. Сумы “складалі дзясяткі тысяч рублёў”.

Паводле інфармацыі ведамства, Следчы камітэт распачаў шэсць крымінальных спраў. Падазраваныя знаходзяцца ў следчым ізалятары і, як сцвярджаецца, “актыўна супрацоўнічаюць са следствам”. МУС адзначала, што ім пагражае да 15 гадоў пазбаўлення волі.

На фоне гучных крымінальных спраў кіраўніцтва БЧ 26 красавіка прынесла клятву аб “недапушчальнасці карупцыйных праяў”.