У Гданьску затрыманы 37-гадовы беларус, за гвалт у дачыненні да польскага дзіцяці яму пагражае да 3 гадоў турмы

16 траўня, Позірк. У Гданьску (Польшча) затрыманы 37-гадовы грамадзянін Беларусі, які “пагражаў васьмігадоваму хлопчыку і парушыў яго фізічную недатыкальнасць”, паведамляе ўпраўленне мясцовай паліцыі.

Удакладняецца, што мужчына “схапіў дзіця за шыю і сціснуў яе”.

“Такім чынам злачынца адрэагаваў на скаргі сваёй дачкі на тое, што хлопчык не хоча з ёй гуляць. Мужчыну прад’явілі абвінавачанні ў здзейсненых ім злачынствах, яму пагражае да трох гадоў пазбаўлення волі”, — гаворыцца ў паведамленні.

Інцыдэнт адбыўся на дзіцячай пляцоўцы, хлопчык у выніку дзеянняў беларуса не пацярпеў, у медыцынскай дапамозе патрэбы не мае.

“Мужчына быў п’яны, канцэнтрацыя алкаголю ў яго арганізме складала каля 2,5 праміле. Жыхар Гданьска правёў ноч у сацыяльным доме неадкладнай дапамогі для нецвярозых асобаў”, — паведамілі ў паліцыі.

Затрыманаму прад’яўленыя абвінавачанні ў “парушэнні фізічнай недатыкальнасці непаўналетняга і ў пагрозах здзейсніць у дачыненні да яго злачынства”.