Латушка прапанаваў Еўракамісіі гарманізаваць гандлёвыя абмежаванні для Масквы і Мінска
17 траўня, Позірк. Прапановы ўводзіць аднолькавыя гандлёвыя абмежаванні ў дачыненні Расіі і рэжыма Аляксандра Лукашэнкі як “саўдзельніка ў агрэсіі” РФ супраць Украіны накіраваў у Еўракамісію і міністэрствы замежных спраў шэрагу краін Еўропы намеснік кіраўніцы Аб’яднанага пераходнага кабінета (АПК), кіраўнік Народнага антыкрызіснага ўпраўлення Павел Латушка, паведамляе прэс-служба АПК.
На сустрэчах з амбасадарам Літвы ў Польшчы Вальдэмарасам Сарапінасам і яго латвійскім калегам Юрысам Пойкансам 16 траўня ў Варшаве палітык заявіў пра важнасць “сінхранізаванага падыходу па ўвядзенні магчымага гандлёвага эмбарга на пастаўкі тавараў з Расіі, распаўсюджваючы патэнцыйныя абмежаванні і ў дачыненні да рэжыму Лукашэнкі”. На яго думку, гаворыцца ў паведамленні, гэта неабходна для “спынення саўдзелу рэжыму [Лукашэнкі] у агрэсіі Расіі супраць Украіны і спынення ўнутраных рэпрэсій”.
“Павел Латушка адзначыў, што іншы падыход створыць шырокія магчымасці для рэжыму зарабляць на абыходзе як санкцый, так і гандлёвых абмежаванняў”, — падкрэсліў АПК.
З літоўскім дыпламатам Латушка, паводле інфармацыі палітычнай структуры, асобна абмеркаваў “пытанні [прыцягнення да] адказнасці прадстаўнікоў рэжыму Лукашэнкі ў рамках міжнародных інстытутаў”.
14 траўня амбасадары краін — членаў ЕС узгаднілі 17-ы пакет санкцый супраць Расіі. Меры, якія плануецца зацвердзіць 20 траўня, сярод іншага прадугледжваюць замарозку актываў у дачыненні да высокапастаўленых расійскіх палітыкаў і бізнесменаў, забарону на экспарт хімікатаў, што выкарыстоўваюцца ў вытворчасці зброі, гандлёвыя абмежаванні для дзясяткаў кампаній, якія ўдзельнічаюць у абыходзе санкцый, ды інш. Ці закрануць новыя санкцыі Беларусь, пакуль невядома.
