Лукашэнка другі раз за 11 дзён павіншаваў папу Льва XIV
18 траўня, Позірк. “Ад імя беларускага народа і сябе асабіста” Аляксандр Лукашэнка павіншаваў з днём інтранізацыі папу рымскага Льва XIV.
“Абранне на пасаду ў гэты няпросты перыяд глабальных супярэчнасцяў сёння набывае асаблівае значэнне, — цытуе віншавальніка неафіцыйны тэлеграм-канал яго прэс-службы “Пул Першага”. — Ваш заклік да міжнароднай супольнасці цалкам адпавядае пазіцыі Беларусі, якая заўсёды выступае за мір і згоду паміж народамі. Толькі сумеснымі намаганнямі можна дасягнуць агульных мэтаў”.
Лукашэнка, як адзначаецца, выказаў упэўненасць, што “высокая місія” папы Льва XIV на чале рымска-каталіцкай царквы “будзе спрыяць паглыбленню міжканфесійнага дыялогу і захаванню хрысціянскіх каштоўнасцяў”.
8 траўня Лукашэнка павіншаваў Льва XIV з абраннем папам рымскім і запрасіў яго ў Беларусь. Тады яму было “прыемна адзначыць”, што “апошнім часам адносіны паміж Рэспублікай Беларусь і Святым Пасадам характарызуюцца пазітыўнай дынамікай, а <…> [узаемнае] бачанне шляхоў вырашэння надзённых праблем сучаснага свету супадае”.
Інтранізацыя (уступленне на пасаду) пантыфіка пройдзе 18 траўня ў Ватыкане. На ёй будзе прысутнічаць дэлегацыя беларускіх уладаў на чале са спікерам Палаты прадстаўнікоў Ігарам Сергеенкам, які знаходзіцца пад санкцыямі.
69-гадовы амерыканскі кардынал Роберт Фрэнсіс Прэвост (папа Леў XIV) быў абраны кіраўніком рымска-каталіцкай царквы 8 мая. Выбары адбыліся пасля смерці папы Францішка 21 красавіка 2025 года.
Беларускія дэмакратычныя сілы 8 траўня выказалі надзею, што папа Леў XIV стане голасам падтрымкі для пераследуемых.
Папа Леў XIV заклікаў да вызвалення зняволеных журналістаў
12 траўня, Позірк. Салідарнасць са зняволенымі журналістамі выказаў 12 траўня кіраўнік рымска-каталіцкай царквы Леў XIV на сустрэчы з прадстаўнікамі сусветных СМІ, паведамляе партал навін Ватыкана. Такіх журналістаў пантыфік назваў "змагарамі за права народаў на інфармацыю" і заклікаў да іх вызвалення. …