Інвестыцыі ў асноўны капітал выраслі на 35,8% — Белстат

20 траўня, Позірк. Інвестыцыі ў асноўны капітал Беларусі ў студзені — красавіку 2025 года склалі 14,8 млрд рублёў (за аналагічны перыяд 2024-га — 10,9 млрд; +35,8%), сведчаць даныя Нацыянальнага статыстычнага камітэта.

На прадпрыемствы Мінскай вобласці прыпала 24,9% ўкладанняў (+0,2 працэнтнага пункта; тут і далей у гадавым вымярэнні). Далей ідуць Мінск — 21,1% (+1,6 п.п.), Гомельская вобласць — 13,8% (+0,7 п.п.), Брэсцкая — 12,9% (-0,8 п.п.), Гродзенская — 9,6% (-1,3 п.п.), Віцебская — 8,9% (-0,4 п.п.), Магілёўская — 8,7% (-0,1 п.п.).

У асноўны капітал прыватных кампаній паступіла 55,8% інвестыцый (+3,2 п.п.), дзяржпрадпрыемстваў — 37,6% (-5,8 п.п.), замежных арганізацый — 6,6% (+2,6 п.п.).

У тэхналагічнай структуры лідарам стала сфера будаўніча-мантажных работ, на якую прыпала 47,6% ўсіх інвестыцый (-0,2 п.п.). З катэгорыяй “Машыны, абсталяванне, транспартныя сродкі” было звязана 37,9% укладанняў (-0,7 п.п.).

Прэм’ер-міністр Аляксандр Турчын 18 сакавіка ў эфіры тэлеканала “Беларусь 1” не выключыў, што на працягу гэтага года будуць прадстаўленыя інвестары, якія “зробяць свой унёсак у розныя сферы эканомікі Беларусі, у тым ліку і ў вытворчую”.

Паводле даных Белстата, у 2024 годзе ў асноўны капітал Беларусі было ўкладзена 44,4 млрд рублёў, 2023-м — 35,7 млрд, 2022 — 27,8 млрд.

Летась замежныя інвестары ўклалі ў рэальны сектар эканомікі Беларусі 6,9 млрд долараў — на 10,4% менш, чым у 2023-м (7,7 млрд).

У выглядзе прамых замежных інвестыцый (74,8% усяго аб’ёму) паступіла 5,2 млрд долараў (5,8 млрд; -10,3%).

Згодна з зацверджанымі Аляксандрам Лукашэнкам важнейшымі эканамічнымі прагнознымі (дэ-факта — планавымі) параметрамі на 2025 год, рост інвестыцый па выніках года павінен скласці 7,8%.