Украіна яшчэ на 5 гадоў падоўжыла антыдэмпінгавыя пошліны на беларускі цэмент

22 траўня, Позірк. Украіна падоўжыла на 5 гадоў дзеянне ўведзеных у 2019 годзе антыдэмпінгавых пошлін на імпарт цэменту з Беларусі, Малдовы і Расіі, а таксама металапракату з антыкаразійным пакрыццём з Кітая і РФ, паведаміў украінскі інфармацыйны партал пра фінансавыя рынкі fixygen.ua са спасылкай на інфармацыю Міністэрства эканомікі.

Рашэнне падощжыць дзеянне пошлін, як заяўлена, прыняла міжведамасная камісія па міжнародным гандлі.

Адзначаецца, што ў частцы беларускага цэменту памер пошліны складае 57,03%, цэменту з Малдовы — 94,46%, РФ — 114,95%.

Пры гэтым не ўдакладняецца, ці паступае цэмент з Беларусі і РФ на рынак Украіны пасля пачатку расійскай агрэсіі ў лютым 2022 года, падтрыманай афіцыйным Мінскам.

Увесну 2021 года Беларуская цэментная кампанія (БЦК) заяўляла пра адкрыццё свайго прадстаўніцтва ва Украіне і паспяховыя перагаворы з буйнымі лагістычнымі кампаніямі, якія прапрацоўвалі пытанне дастаўкі прадукцыі БЦК па тэрыторыі Украіны і за яе межы.

У кастрычніку 2021 года дзяржСМІ са спасылкай на БЦК паведамлялі, што Украіна зацікаўленая ў рэгулярных пастаўках беларускага цэменту нават з улікам антыдэмпінгавых пошлін, пра што тады нібыта вяліся адпаведныя перагаворы.