Дзве малалетнія дзяўчынкі загінулі на пажары ў Камянецкім раёне

23 траўня, Позірк. На пажары ў Камянецкім раёне (Брэсцкая вобласць) загінулі дзве малалетнія дзяўчынкі, паведамляе Следчы камітэт.

Трагедыя адбылася раніцай 23 траўня ў вёсцы Амелянец. Паводле звестак ведамства, дзеці (6 месяцаў і 3 гады) у несвядомым стане былі выяўленыя падчас тушэння агню. Рэанімацыйныя мерапрыемствы не прынеслі поспеху, медыкі канстатавалі смерць.

Камянецкім раённым аддзелам СК распачата крымінальная справа паводле ч. 3 арт. 304 Крымінальнага кодэкса (парушэнне патрабаванняў пажарнай бяспекі, якое пацягнула па неасцярожнасці смерць чалавека альбо прычыненне цяжкага цялеснага пашкоджання двум або больш асобам).

Следствам разглядаюцца некалькі версій узнікнення пажару, у тым ліку “кароткае замыканне і занесеная крыніца агню”.

Устаноўлена, што на момант узгарання дзеці знаходзіліся дома адны.

Паводле афіцыйных звестак МНС на 6 гадзін раніцы 23 траўня (да пажару ў Камянецкім раёне), з пачатку года агонь забраў жыцці 286 чалавек (за аналагічны перыяд 2024-га — 246; +16,3%), у тым ліку 1 дзіцяці (6).

“Позірк“ неаднаразова звяртаў увагу на заніжэнне статыстыкі смяротнасці на пажарах у зводках МНС.

На мінулым тыдні гэта таксама адбывалася. У зводцы, апублікаванай 16 траўня, адзначалася, што ў 2025 годзе на пажарах загінула 282 чалавекі. На наступны дзень МНС інфармавала аб адным загінуўшым на працягу сутак, аднак у абагульненай табліцы паведамлялася не аб 283 ахвярах агню, а аб 281.