BySol не зможа працаваць у такім маштабе, як зараз — Стрыжак

24 траўня, Позірк. У сувязі з прыпыненнем фінансавання НДА за мяжой з боку новай прэзідэнцкай адміністрацыі ЗША беларускі грамадскі сектар знаходзіцца ў “найгоршай сітуацыі за апошнія 25 год”, заявіў сузаснавальнік фонда салідарнасці BySol Андрэй Стрыжак на IV Канферэнцыі беларусаў свету 24 траўня ў Варшаве.

Паводле яго, гэты стан не зменіцца ў бліжэйшы час: “ЗША — гэта надоўга, як мінімум, на чатыры гады”.

BySol стаіць перад такімі ж самымі выклікамі, як і іншыя арганізацыі грамадзянскай супольнасці, дадаў актывіст, і “ў такім маштабе, як ён зараз працуе, хутчэй за ўсё, працаваць не будзе”.

Арганізацыя вымушана “скарачацца, карэктаваць выдаткі”: “Гэта значыць, што даўжэй будуць разглядацца заяўкі, <…> менш будзе магчымасцяў дапамагаць людзям, <…> можа быць, не ўсе эвакуацыі [з Беларусі] будуць здзейсненыя”.

“Адзіная мая парада да ўсіх — карыстайцеся тымі інструментамі, што ёсць, і прыдумляйце новыя”, — дадаў Стрыжак.

У сувязі з гэтым ён прапанаваў НДА задумацца аб частковай камерцыялізацыі сваёй дзейнасці: “Можа быць, мы павінны даваць нейкія кансультацыі платныя, можа быць, нам трэба рабіць нейкія навучальныя курсы платныя, шукаць грошы там, дзе мы іх раней не бралі”.