У Брэсцкай вобласці, якая мяжуе з Украінай, 27 траўня зноў правераць сістэму апавяшчэння насельніцтва

26 траўня, Позірк. Чарговая “планавая тэхнічная праверка сістэмы апавяшчэння насельніцтва” ў Брэсцкай вобласці адбудзецца 27 траўня з 12:00 да 13:00, вынікае з паведамлення Міністэрства па надзвычайных сітуацыях.

У ходзе праверкі, паводле інфармацыі ведамства, “будуць уключацца электрасірэны, пройдзе перахоп УКХ-FM вяшчання”. МНС заклікала “захоўваць спакой” і папярэдзіла, што “ніякіх дзеянняў” рабіць “не трэба”.

Гэта будзе ўжо трэцяя праверка сістэмы апавяшчэння ў Брэсцкай вобласці за няпоўныя два месяцы. Папярэднія праводзіліся 8 красавіка і 22 красавіка.

У Мінскай вобласці аналагічную праверку правялі 16 красавіка, Магілёве — 15–17 красавіка (у рамках вучэнняў па грамадзянскай абароне ), Гомельскай вобласці — 20 сакавіка і 30 студзеня.

13 сакавіка планавая праверка сістэмы апавяшчэння праводзілася па ўсёй Беларусі.

Пра прычыны такіх частых праверак сістэм апавяшчэння МНС не паведамляе. Разам з тым звяртае на сябе ўвагу той факт, што праверкі праводзяцца ў тым ліку ў абласцях, якія мяжуюць з Украінай, куды рэгулярна ўрываюцца беспілотныя лятучыя апараты, якія, як мяркуецца, належаць Расіі.

У Беларусі зафіксавана некалькі выпадкаў падзення дронаў на будынкі, аднак інфармацыі пра тое, што пры гэтым актывавалася сістэма апавяшчэння, няма.

З пачатку поўнамаштабнай вайны РФ супраць Украіны праверкі сістэмы апавяшчэння сістэматычна праходзяць, напрыклад, у Літве, Польшчы, Чэхіі. Для гэтага выкарыстоўваюцца рэпрадуктары на вуліцах, праз якія перадаецца паведамленне і гучыць сірэна.