МУС абвінаваціла памерлага экс-выкладчыка БНТУ ў нападзе на свайго супрацоўніка

29 траўня, Позірк. Міністэрства ўнутраных спраў пракаментавала 29 траўня смерць былога выкладчыка Беларускага нацыянальнага тэхнічнага ўніверсітэта, з заявай у тэлеграм-канале ГУУС Мінгарвыканкама выступіў прадстаўнік галоўнага ўпраўлення ўласнай бяспекі ведамства Раман Прыгодзіч.

Паводле яго слоў, былы выкладчык 28 траўня “паспрабаваў прайсці ў навучальную ўстанову і аказаў супраціў супрацоўнікам міліцыі”.

“Учора днём у міліцыю паступіў званок з установы адукацыі аб аказанні дапамогі. Са слоў заяўніка, былы выкладчык зладзіў канфлікт з адміністрацыяй і спрабуе незаконна прайсці на тэрыторыю. Супрацоўнікі міліцыі, якія прыбылі на месца, прапанавалі 47-гадоваму мужчыну прайсці ў раённае ўпраўленне для разбіральніцтва, аднак той аказаў супраціў і паспрабаваў уцячы. Пры затрыманні мінчанін нанёс некалькі ўдараў супрацоўніку міліцыі”, — сказаў Прыгодзіч.

Паводле яго слоў, “па гэтым факце праводзіцца праверка”.

Пра смерць мужчыны прадстаўнік МУС не ўзгадаў.

28 траўня тэлеграм-каналы, якія асвятляюць жыццё Мінска, паведамілі пра смерць былога выкладчыка БНТУ. Адзначалася, што мужчына памёр пасля таго, як за ім ва ўніверсітэт, куды ён спрабаваў трапіць, прыйшлі супрацоўнікі МУС. На апублікаваных відэазапісах паказаныя кадры пагоні — сілавікі пераследвалі былога выкладчыка, каб затрымаць.

Аб гібелі педагога сведчаць фатаграфіі, на якіх цела накрыта прасцінай.

У тэлеграм-каналах паведамлялася, што выкладчыка маглі затрымліваць за дамаганне да студэнтаў.

Выданне “Наша Ніва” паведаміла, што смерць мужчыны пацверджаная супрацоўнікамі БНТУ. Паводле іх слоў, ён памёр ад сардэчнага прыступу.