29 траўня, Позірк. У Следчага камітэта маецца “дакладная інфармацыя ў дачыненні да больш чым 1 тыс. карыстальнікаў, якія прайшлі рэгістрацыю ў дадатку “Новая Беларусь” і ўключаных у склад яе іншых сэрвісаў”, паведаміла 29 траўня ведамства.
Заяўляецца аб узбуджэнні крымінальнай справы ў дачыненні да “ўдзельнікаў і кіраўніка экстрэмісцкага фарміравання Паўла Лібера” і аб спыненні “супрацьпраўнай дзейнасці ўдзельнікаў фарміравання, у тым ліку актыўных карыстальнікаў, якія знаходзяцца на тэрыторыі Рэспублікі Беларусь”.
“Следчыя маюць інфармацыю аб структуры экстрэмісцкага фарміравання, яго ўдзельніках, кіраўніках, мэтах і матывах функцыянавання, — гаворыцца ў паведамленні. — Удзельнікам экстрэмісцкага фарміравання, у залежнасці ад ступені ўдзелу ў здзяйсненні злачынства, прад’яўленыя абвінавачванні, асобныя — заключаны пад варту”.
Раней у сацсетках былі апублікаваныя відэа дзвюх грамадзянак Беларусі, бізнесы якіх размяшчаліся на платформе “Новая Беларусь”. Мяркуючы па змесце, відэа запісаныя пад ціскам, жанчыны знаходзяцца на тэрыторыі Беларусі.
Платформа “Новая Беларусь” створана 2 снежня 2022 года для анлайн-узаемадзеяння беларусаў у розных сферах. У ліку іншага на пляцоўках праекта публікуецца інфармацыя аб бізнесах беларускіх эмігрантаў у розных краінах, звычайна ў сферы паслуг.
26 снежня 2023-га “Новая Беларусь” прызнана Камітэтам дзяржаўнай бяспекі “экстрэмісцкім фарміраваннем”.
У адпаведным пераліку пазначана, што статус “экстрэмісцкага фарміравання” атрымала “група грамадзян з ліку стваральнікаў, адміністратараў, удзельнікаў камунікатыўнай платформы “Новая Беларусь” з інтэграванымі ў яе структуру інтэрнэт-супольнасцямі”.
У прыватнасці, гэта інтэрнэт-сайт “Новая Беларусь” (newbelarus.com, newbel.info), акаўнты ў “X” (twitter.com/newbelarus_news), “Інстаграме” (instagram.com/newbelarusofficial) і “Фэйсбуку” (facebook.com/newbelarusofficial), ютуб-канал (newbelarusofficial) і мабільныя дадаткі “Новая Беларусь”.
У рашэнні ў якасці датычных указаныя стваральнікі праекта Павел Лібер і Яраслаў Ліхачэскі.
Кантэнт платформы раней быў прызнаны “экстрэмісцкімі матэрыяламі”.
Лібер таксама з’яўляецца стваральнікам платформы “Голас”, якая выкарыстоўвалася ў 2020 годзе для верыфікацыі вынікаў галасавання на прэзідэнцкіх выбарах (таксама прызнаная КДБ “экстрэмісцкім фарміраваннем”).
18 сакавіка 2024 года Лібер прыгавораны завочна па справе аб зрыве рэферэндуму да чатырох гадоў пазбаўлення волі паводле ч. 2 арт. 191 КК (перашкода працы Цэнтральнай выбарчай камісіі, а таксама камісій па рэферэндуме, здзейсненае з ужываннем пагрозы і іншым спосабам, групай асоб паводле папярэдня змовы).
27 студзеня 2025 года КДБ прызнаў краўдфандынгавы праект Gronka “экстрэмісцкім фарміраваннем”, назваўшы Лібера як аднаго з датычных да яго.
11 лютага гэтага года праект “Новая Беларусь” перайменаваны ў Svae.
