Лукашэнка абмеркаваў з урадам стварэнне “беларускага НАСА”

29 траўня, Позірк. Стварэнне айчыннага касмічнага агенцтва абмеркаваў Аляксандр Лукашэнка на пасяджэнні ўрада 29 траўня, адпаведнае відэа апублікаваў сайт videobel.by.

“Чым дрэнная або недастатковая дзеючая структура кіравання [касмічнай галіной]? Ці здольная яна цалкам, паўнавартасна ўлічваць і ўдзельнічаць у міжнародных праграмах? І што атрымаем ад стварэння беларускага НАСА? Ці будзе эфект супастаўны з выдаткамі на новую арганізацыю і яе ўтрыманне?” — сказаў Лукашэнка.

Паводле яго слоў, у Беларусі “яшчэ ў савецкі час <…> склалася касмічная галіна з вялікім складнікам у сферах абароны, навукі, сувязі і іншых галінах”.

“За гады суверэннага развіцця мы добра прасунуліся ў гэтых напрамках. Асабліва цяпер, знаходзячыся пад санкцыямі. Вядзем работы па стварэнні расійска-беларускага касмічнага апарата дыстанцыйнага зандзіравання Зямлі звышвысокага разрашэння. Практычна ўсе найбольш важныя кампаненты падобнага спадарожніка ствараюцца ў Беларусі і вывешваюцца на платформу расійскую. Пры гэтым большую частку мэтавай апаратуры вырабляе наш “Пеленг”, — сказаў Лукашэнка.

Нацыянальнае ўпраўленне па аэранаўтыцы і даследаванні касмічнай прасторы (НАСА) — незалежнае агенцтва федэральнага ўрада ЗША, знаходзіцца ў падпарадкаванні амерыканскага прэзідэнта. Рэалізуе касмічную праграму ЗША, праводзіць навуковыя даследаванні паветранай і касмічнай прастор і навукова-тэхналагічныя даследаванні ў галіне авіяцыі, паветраплавання і касманаўтыкі.

Беларускі спадарожнік зандзіравання іёнасферы прайшоў усе выпрабаванні, уключаючы “прымерку да пускавога кантэйнера”, яго запуск адбудзецца, як мяркуецца, у трэцім квартале 2025 года, вынікае са слоў дырэктара УП “Геаінфармацыйныя сістэмы” Нацыянальнай акадэміі навук (НАН) Сяргея Залатога на прэс-канферэнцыі 10 красавіка ў Мінску.

Ён таксама паведаміў, што рэалізацыя сумеснага беларускага-расійскага праекта па развіцці сістэмы дыстанцыйнага зандзіравання Зямлі (разлічаны на 2024–2028 гады) вядзецца ў штатным рэжыме.

Раней заяўлялася, што вынікам павінен стаць “запуск беларуска-расейскага касмічнага апарата дыстанцыйнага зандзіравання Зямлі звышвысокага разрашэння (35 см) з тэрмінам актыўнага існавання на арбіце не менш за сем гадоў”.

Залаты паведаміў, што беларускі бок (ААТ “Пеленг”) стварае мэтавую апаратуру, а прадпрыемства “Геаінфармацыйныя сістэмы” “мадэрнізуе наземную інфраструктуру Беларускай касмічнай сістэмы для працы з гэтым спадарожнікам”.

19 траўня 2024 года аб’яднанне BelPol апублікавала на сваім ютуб-канале расследаванне, у якім паведамлялася пра тое, як беларускія кампаніі зарабляюць мільёны долараў на пастаўках у Расію ўзбраенняў у абыход санкцый.

У цэнтры апавядання — дзейнасць ААТ “Пеленг”, якое знаходзіцца пад санкцыямі, аднаго з вядучых у сістэме Дзяржкамваенпрама. На аснове наяўных дакументаў BеlPol сцвярджаў, што кампанія актыўна ўдзельнічае ў аснашчэнні расійскай баявой тэхнікі аптычнымі прыцэламі і іншым высокадакладным абсталяваннем. У гэтым ёй дапамагаюць іншыя беларускія прадпрыемствы, а таксама спецыяльна зарэгістраваныя фірмы-пракладкі. Камплектуючыя закупляюцца ў Кітаі, канчатковы прадукт прадаецца ў РФ і паступае на ўзбраенне расійскай арміі.