Мінэканомікі анансуе змякчэнне кантролю бізнесу і “перагляд адказнасці” за эканамічныя парушэнні

30 траўня, Позірк. Скарачэнне кантрольнай нагрузкі на бізнес і “перагляд падыходаў да адказнасці за эканамічныя правапарушэнні” прадугледжаны падрыхтаванай Міністэрствам эканомікі новай рэдакцыяй дырэктывы № 4 “Аб развіцці прадпрымальніцкай ініцыятывы і стымуляванні дзелавой актыўнасці ў Рэспубліцы Беларусь”, паведаміў яе кіраўнік Юрый Чабатар на “форуме жанчын-прадпрымальніц “Энергія і стварэнне” 29 траўня ў Мінску.

Паводле яго слоў, якія прыводзіць прэс-служба ведамства, абноўлены дакумент будзе скіраваны на спрашчэнне рэгулятыўных умоў, змякчэнне фарматаў кантролю з боку дзяржаўных органаў і “стварэнне роўных “правілаў гульні” для прадпрымальнікаў розных паводле маштабу бізнесу і галін”.

“Дакумент змяшчае меры, накіраваныя на скарачэнне адміністрацыйнай нагрузкі, лічбавізацыю працэсаў, пашырэнне магчымасцяў удзелу суб’ектаў малога і сярэдняга прадпрымальніцтва ў дзяржаўных закупках, спрашчэнне падатковага ўліку, а таксама развіццё новых механізмаў фінансавання, такіх як краўдфандынг, небанкаўскі факторынг і іншых. Прадугледжаны таксама шэраг захадаў, накіраваных на развіццё інавацыйнай сферы і стартап-руху”, — сказаў чыноўнік.

Чабатар анансаваў грамадскае абмеркаванне праекта “ў найбліжэйшы час”.

Пра тое, што ўлады рыхтуюць змены ў дырэктыву Аляксандра Лукашэнкі ад 31 снежня 2010 года, стала вядома ў красавіку з паведамлення Рэспубліканскага саюза прамыслоўцаў і прадпрымальнікаў.

Дырэктыва, якая складаецца з дзевяці раздзелаў, прадугледжвала “разняволіць дзелавую ініцыятыву” і “істотна павысіць ролю прадпрымальніцтва, рэальна павялічыць яго ўнёсак у фарміраванне тэмпаў эканамічнага росту, забеспячэнне высокай эфектыўнасці функцыянавання беларускай эканомікі”.

2011 год у сувязі з падпісаннем акта быў абвешчаны Годам прадпрымальнасці.

Дзесяць гадоў таму ўлады ўжо дэкларавалі намер актуалізаваць дырэктыву № 4. У красавіку 2015 года пасля грамадскага абмеркавання праекта дакумента ён быў унесены ва ўрад, але пасля накіраваны на дапрацоўку Адміністрацыяй прэзідэнта і паўторна ўнесены ў Савет Міністраў.

У сакавіку 2016 года прадстаўнікі асноўных бізнес-саюзаў накіравалі ў Адміністрацыю прэзідэнта ліст з прапановай яшчэ дапрацаваць апошнюю рэдакцыю праекта, паколькі яна мела “дэкларатыўны характар”.

Пасля гэтага стала вядома, што змяненні ў дакумент уносіцца не будуць.

У лютым паведамлялася пра падрыхтоўку ўказа, “накіраванага на стварэнне максімальна спрыяльных адміністрацыйна-прававых, арганізацыйных і эканамічных умоў функцыянавання і развіцця бізнесу”.

Праца над дакументамі вядзецца на фоне адначасовага ўзмацнення кантролю ўладаў над прыватным бізнесам. Указ ад 21 лютага 2025 года № 74 “Аб узмацненні ролі старшынь выканаўчых камітэтаў базавага ўзроўню ў развіцці рэгіёнаў” даў ім права ўзгадняць прызначэнне кіраўнікоў арганізацый, у тым ліку прыватнай формы ўласнасці.