За травень у Беларусі патанула 27 чалавек — даныя ТРВОД

2 чэрвеня, Позірк. За травень 2025 года ў Беларусі патанула 27 чалавек, вынікае з праведзенага “Позіркам”аналізу даных Беларускага рэспубліканскага таварыства ратавання на водах (ТРВОД).

Разам з тым на сайце Міністэрства па надзвычайных сітуацыях апублікаваныя звесткі пра 16 патанулых за апошні вясновы месяц (жанчыны — 3, мужчыны — 13).

Здарэнняў з трагічным вынікам у мінулым месяцы не зафіксавана толькі ў Мінскай вобласці. У Брэсцкай вобласці — 4 (жанчыны — 1, мужчыны — 3), Віцебскай — 3 (1; 2), Магілёўскай — 3 (0; 3), Мінску — 3 (0; 3), Гродзенскай вобласці — 2 (1; 1), Гомельскай — 1 (0; 1).

Сярод загінулых тры пенсіянеры, дзіця, а таксама грамадзянін Эфіопіі.

6 лютага старшыня ТРВОД Андрэй Чарняўскі заявіў, што вынікам працы, што вялася ў 2024 годзе, стала “зніжэнне гібелі ў адносінах да мінулага года і да даных пяці папярэдніх гадоў”.

Паводле яго слоў, з агульнай колькасці трагедый 10% адбыліся ў прыватных падворках. “На гэту катэгорыю паўплываць вельмі складана”, — падкрэсліў кіраўнік арганізацыі.