На мяжы з Латвіяй знойдзены замежнік з пераломам нагі — Дзяржпагранкамітэт
5 чэрвеня, Позірк. На мяжы з Латвіяй 4 чэрвеня полацкія пагранічнікі знайшлі замежніка афрыканскай знешнасці са шматлікімі траўмамі, паведамляе прэс-служба Дзяржаўнага пагранічнага камітэта.
Вайскоўцы аказалі мужчыну першую дапамогу і выклікалі брыгаду хуткай медыцынскай дапамогі. Медыкі, што прыбылі на месца, дыягнаставалі ў мужчыны “інфікаваныя раны, а таксама закрыты пералом левай нагі ў вобласці калена”.
Мужчына дастаўлены ў Верхнядзвінскую цэнтральную раённую бальніцу (Віцебская вобласць) для далейшага лячэння.
Паводле даных пагранічнага ведамства, з 1 па 22 траўня на мяжы з Латвіяй беларускія пагранічнікі знайшлі 6 цел мігрантаў. З 2021 года на мяжы з Еўрасаюзам, як сцвярджаецца, загінула 74 чалавекі.
3 чэрвеня Дзяржаўная памежная ахова Латвіі зафіксавала рэкордную за апошні месяц колькасць спробаў незаконнага пранікнення з Беларусі — 123. Больш да гэтага было 3 траўня — 130. Затым іх колькасць вагалася ад 32 да 106 (мінімум і максімум прыпалі на суседнія даты — 26 і 25 траўня адпаведна).
Згодна з дакладам “Бяспечнага шляху няма. Смерці мігрант_ак на мяжы Еўрапейскага саюза і Беларусі” праваабарончай арганізацыі Human Constanta, з вясны 2021-га па канец сакавіка 2024-га не менш за 116 нелегальных мігрантаў, у тым ліку 15 жанчын, памерла на мяжы Беларусі з краінамі ЕС. Непасрэдна на тэрыторыі Беларусі на канец сакавіка 2024 года памерла не менш як 47 чалавек.
Беларускія ўлады рэгулярна паведамляюць пра пакуты, фізічныя траўмы і гібель замежнікаў на мяжы з краінамі ЕС, нязменна ўскладаючы адказнасць за гэта на супрацоўнікаў сілавых ведамстваў Польшчы, Літвы і Латвіі. Пры гэтым беларускі бок не паведамляе, як мігранты трапляюць на мяжу з краінамі ЕС у зоне адказнасці пагранічнага ведамства.
Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, бо іх туды нібыта паклікалі.
