Буйны расійскі холдынг амаль на 70% павялічыў экспарт свініны ў Беларусь

6 чэрвеня, Позірк. У студзені — траўні 2025 года расійскі холдынг “Аграэка” экспартаваў у Беларусь 6.784 тоны свіных паўтуш, буйнакавалкавых адрубаў і субпрадуктаў прадукцыі — на 68% больш, чым годам раней.

Паводле інфармацыі расійскага бізнес-выдання “Абірэг”, паводле вынікаў усяго 2024 года кампанія паставіла ў Беларусь больш за 13,5 тыс. т пазначанай прадукцыі. Беларускі рынак, на думку камерцыйнага дырэктара “Аграэка” Дзмітрыя Аляксеева, “валодае высокім экспартным патэнцыялам дзякуючы развітай мясаперапрацоўчай галіне і станоўчым водгукам партнёраў”.

Кампанія “Аграэка” была створана ў 2009 годзе. Уваходзіць у пяцёрку галоўных вытворцаў свініны ў РФ. У цяперашні час, як указана на яе сайце, у структуры — дзясяткі свінагадоўчых пляцовак, селекцыйна-генетычныя цэнтры, камбікормавыя заводы і шэраг інфраструктурных прадпрыемстваў. Вытворчасць поўнага цыклу размешчана ў Варонежскай і Тульскай абласцях.

Расельгаснагляд раней паведамляў, што ў 2024 годзе з 65,4 тыс. т расійскай свініны, вывезенай за мяжу, у Беларусь было экспартавана 27,9 тыс. т (у 1,5 разы больш, чым у 2023-м).

Пагалоўе свіней на канец красавіка 2025 года ў Беларусі за год скарацілася на 15,3% (з 2 млн 296 тыс. 35 да 1 млн 944 тыс. 192).

Іх стала больш толькі ў Магілёўскай вобласці — 188.069 (170.736; +10,2%). У іншых рэгіёнах адмоўная дынаміка: у Гомельскай — 153.763 (235.811; -34,8%), Мінскай — 363.048 (545.816; -33,5%), Брэсцкай — 318.255 (373.356; -14,8%), Віцебскай — 365.508 (391.577; -6,7%), Гродзенскай — 555.549 (578.739; -4%).

28 траўня Аляксандр Лукашэнка падчас дакладу старшыні Брэсцкага аблвыканкама Пятра Пархомчыка анансаваў у гэтым годзе “вельмі жорсткую размову наконт падзяжу жывёлы”.