Палата прадстаўнікоў прыняла ў першым чытанні законапраект, які забараняе пазыкі пад заклад адзінага жылля

9 чэрвеня, Позірк. Дэпутаты Палаты прадстаўнікоў Нацыянальнага сходу (ПП НС) 9 чэрвеня ў першым чытанні прынялі законапраект, які прадугледжвае абмежаванне валютных пазык фізічным асобам, забарону на пазыкі пад заклад нерухомасці (адзінага жылля).

“Людзі ўсё часцей звяртаюцца да выкарыстання пазыковых сродкаў, крэдытаў для вырашэння сваіх надзённых пытанняў”, — цытуе старшыню ПП НС Ігара Сергеенку прэс-служба ніжняй палаты парламента.

На думку распрацоўшчыкаў дакумента, закладзеныя ў ім меры “дазволяць падвысіць давер насельніцтва да банкаў і іншых фінансавых арганізацый, знізіць пазыковую нагрузку на спажыўцоў, забяспечыць абарону іх правоў і законных інтарэсаў”.

Гэта, як сцвярджаецца, таксама будзе садзейнічаць “узмацненню барацьбы з нядобрасумленнымі пазыкадаўцамі, абароне правоў і маёмасных інтарэсаў грамадзян, а таксама скароціць колькасць зваротаў, якія ўтрымліваюць скаргі на няякаснае аказанне паслуг”.

Паводле інфармацыі прэс-службы ПП НС, дэпутаты ў другім чытанні прынялі законапраект па пытаннях дзяржаўнага сацыяльнага страхавання і пенсійнага забеспячэння.

Фізічным асобам — плацельшчыкам падатку на прафесійны даход, згодна з гэтым дакументам, будзе надавацца права “добраахвотнай даплаты ўнёскаў у бюджэт фонду на пенсійнае страхаванне для фармавання сваіх пенсійных гарантый”.

Індывідуальныя прадпрымальнікі (ІП) з гадавым даходам да 12 мінімальных заробкаў (на гэты момант — 8.712) павінны будуць выплачваць у Фонд сацабароны насельніцтва (ФСАН) 35% фактычнага даходу (паводле цяперашняга заканадаўства — такі ж працэнт жорстка ад 12 мінімальных заробкаў).

Калі гадавы даход — 12 мінімальных заробкаў і вышэй, то ўнёскі выплачваюцца з гэтай сумы або, калі захоча ІП, з большай сумы; працэнт такі ж (аналагічна дзейнаму заканадаўству).

ІП — плацельшчыкі адзінага падатку павінны рабіць унёскі за месяцы, калі выплачваўся гэты падатак, — не менш за 35% мінімальнага заробку.

Заканадаўчыя папраўкі пераносяць тэрміны выплаты ўнёскаў у ФСАН з 1 сакавіка на 31 сакавіка года, які ідзе за справаздачным.

Усталёўваецца асаблівы парадак выплаты ўнёскаў у ФСАН пры выяўленні шэрых схем выплаты заробку.

“Для працаадаўцаў скасоўваецца з выплачанага заробку “ў канвертах” абмежавальная норма па налічэнні ўнёскаў у бюджэт фонду з пяці сярэдніх заробкаў па рэспубліцы, — паведамляе прэс-служба ПП НС. — Памер абавязковых страхавых унёскаў на ўтоены заробак для работнікаў не будзе праводзіцца з 3 фактычных выплат пяціразовай велічыні сярэдняга заробку ў рэспубліцы за месяц, які папярэднічае месяцу выяўлення гэтага факта, за кожны дзень выканання работ. Для работнікаў, якія атрымліваюць заробак “у канвертах”, у страхавы стаж для пенсіі будуць улічвацца выплаты з памеру мінімальнага заробку”.

Органы ФСАН нароўні з падатковымі органамі атрымліваюць права вынясення самастойных рашэнняў пра спагнанне запазычанасці суб’ектаў гаспадарання ў парадку, вызначаным заканадаўствам пра выканаўчую вытворчасць.

Аляксандр Лукашэнка 18 лютага падпісаў закон “Аб спажывецкім крэдыце і спажывецкай мікразайме”. Дакумент, як сцвярджалася, скіраваны на “комплекснае ўдасканаленне прававога рэгулявання стасункаў у галіне крэдытавання і мікрафінансавання фізічных асоб”, а таксама “падвышэнне ўзроўню абароны правоў спажыўцоў фінансавых паслуг”.