МНС анансавала чарговыя праверкі апавяшчэння насельніцтва ў Брэсцкай і Мінскай абласцях
9 чэрвеня, Позірк. Аб правядзенні ў Брэсцкай вобласці 10 чэрвеня “планавай тэхнічнай праверкі сістэмы апавяшчэння насельніцтва” паведамляе Міністэрства па надзвычайных сітуацыях.
Праверка будзе праводзіцца з 12:00 да 13:00.
“Падчас праверкі будуць уключацца электрасірэны, пройдзе перахоп УКХ-FM вяшчання на тэрыторыі вобласці. Просім грамадзян захоўваць спакой, ніякіх дзеянняў не патрабуецца”, — адзначае ведамства.
На 11 чэрвеня запланавана аналагічная праверка ў Мінскай вобласці. Заяўлены час — з 9:00 да 13:00, “будуць уключацца электрасірэны”.
У Брэсцкай вобласці гэта будзе чацвёртая праверка сістэмы апавяшчэння за два месяцы. Папярэднія праводзіліся 27 траўня, 8 красавіка і 22 красавіка.
У Мінскай вобласці аналагічную праверку правялі 16 красавіка, Магілёве — 15–17 красавіка (у рамках вучэнняў па грамадзянскай абароне ), Гомельскай вобласці — 20 сакавіка і 30 студзеня.
13 сакавіка планавая праверка сістэмы апавяшчэння праводзілася па ўсёй Беларусі.
Пра прычыны такіх частых праверак сістэм апавяшчэння МНС не паведамляе. Разам з тым звяртае на сябе ўвагу той факт, што праверкі праводзяцца ў тым ліку ў абласцях, якія мяжуюць з Украінай, куды рэгулярна ўрываюцца беспілотныя лятучыя апараты, якія, як мяркуецца, належаць Расіі.
У Беларусі зафіксавана некалькі выпадкаў падзення дронаў на будынкі, аднак інфармацыі пра тое, што пры гэтым актывавалася сістэма апавяшчэння, няма.
З пачатку поўнамаштабнай вайны РФ супраць Украіны праверкі сістэмы апавяшчэння сістэматычна праходзяць, напрыклад, у Літве, Польшчы, Чэхіі. Для гэтага выкарыстоўваюцца рэпрадуктары на вуліцах, праз якія перадаецца паведамленне і гучыць сірэна.
