Падазраваны ў згвалтаванні беларус арыштаваны ў Валгаградзе на два месяцы, распачатая крымінальная справа

10 чэрвеня, Позірк. Суд паводле хадайніцтва следства арыштаваў на два месяцы 40-гадовага грамадзяніна Беларусі, які падазраецца ў здзяйсненні злачынстваў супраць палавой недатыкальнасці ў Валгаградскай вобласці (РФ), паведамляе ТАСС.

У дачыненні да мужчыны распачатая крымінальная справа паводле п. “б” ч. 2 арт. 131 (згвалтаванне, аб’яднанае з пагрозай забойствам), п. “б” ч. 2 арт. 132 (іншыя дзеянні сексуальнага характару, аб’яднаныя з пагрозай забойствам), ч. 1 арт. 162 (разбой) КК РФ.

Паведамляецца, што мужчына раней быў судзімы.

Пра затрыманне ў Валгаградзе грамадзяніна Беларусі паведаміла 8 чэрвеня прэс-служба рэгіянальнага ўпраўлення Міністэрства ўнутраных спраў Расіі.

Як адзначалася, 6 чэрвеня ў паліцыю абласнога цэнтра звярнулася мясцовая жыхарка з заявай пра тое, што “на чыгуначнай станцыі “Акварэль” на яе напаў невядомы мужчына і спрабаваў здзейсніць гвалтоўныя дзеянні сексуальнага характару”. “Дзяўчына здолела даць адпор. Зламыснік завалодаў яе мабільным тэлефонам і схаваўся”, — гаварылася ў паведамленні.

Падобная заява, паводле сцвярджэння паліцыі, паступіла 7 чэрвеня: “У мікрараёне Тулака 19-гадовая дзяўчына стала ахвярай гвалтоўных сексуальных дзеянняў з боку мужчыны”.

Беларуса затрымаў паліцэйскі патруль.

Аператыўнікі, паводле даных ведамства, маюць інфармацыю пра “датычнасць затрыманага да яшчэ шэрагу гвалтоўных палавых злачынстваў, якія здзейсненыя на тэрыторыі некалькіх рэгіёнаў Расіі, у тым ліку Краснадарскага краю”.

Паводле даных паліцыі, замежнік “знаходзіцца на тэрыторыі РФ незаконна”. “Дзеянням грамадзяніна, які даў яму для часовага пражывання ў Валгаградзе жыллё, дадзена прававая ацэнка. Арэндадаўца прыцягнуты да адміністрацыйнай адказнасці”, — падкрэслівалася ў прэс-рэлізе.

Раней паведамлялася, што ў Беларусі колькасць зарэгістраваных згвалтаванняў і спроб згвалтавання за апошнія пяць гадоў скарацілася на 26,5% (з 68 у 2019 годзе да 50 у 2024-м).

У траўні 2024 года МУС Беларусі паведаміла пра выдачу Літве 35-гадовага грамадзяніна, якога Вільнюс абвясціў у вышук па лініі Інтэрпола за групавое згвалтаванне непаўналетняй і іншыя дзеянні.