У мінскім аэрапорце затрыманы мужчына, які знаходзіўся ў вышуку, з “часткова падробленым“ расійскім пашпартам

12 чэрвеня, Позірк. Мужчыну “з пашпартам грамадзяніна Расіі, які выклікаў падазрэнне“, затрымалі беларускія памежнікі ўвечары 10 чэрвеня пры афармленні рэйса, які прыбыў са Стамбула, у Нацыянальным аэрапорце Минск, паведамляе Дзяржаўны пагранічны камітэт.

“Пасля спецыяльнай праверкі было ўстаноўлена, што дакумент часткова падроблены — старонка з устаноўчымі звесткамі ўладальніка ў ім замененая“, — адзначае ведамства.

Паводле інфармацыі ДПК, зламыснік знаходзіцца ў вышуку на тэрыторыі Расійскай Федэрацыі за махлярства.

“Парушальнік затрыманы і змешчаны ў ізалятар часовага ўтрымання ГУУС Мінгарвыканкама. За спробу незаконнага перасячэння мяжы яму пагражае штраф да 100 базавых велічынь (4.200 беларускіх рублёў). Акрамя таго, за выкарыстанне падробленых дакументаў прадугледжана крымінальная адказнасць — абмежаванне волі на тэрмін да двух гадоў“, — паведаміў ДПК.