15 чэрвеня, Позірк. Парламент Грузіі зацвердзіў папраўкі ў закон “Аб прававым становішчы замежнікаў і асоб без грамадзянства”, прынятыя змены апублікаваныя на афіцыйным партале заканадаўчых актаў.
Папраўкі прадугледжваюць укараненне віду на жыхарства для асоб, занятых у ІТ-сферы, індывідуальных прадпрымальнікаў, якія вядуць ІТ-дзейнасць, а таксама для замежнікаў, якія “ўпаўнаважаныя на кіраванне і прадстаўніцтва міжнароднай кампаніі, якая дзейнічае ў сферы інфармацыйных тэхналогій”.
Закон прадугледжвае выдачу такіх ВНЖ таксама членам сем’яў названых катэгорый замежных грамадзян.
Суіскальнік віду на жыхарства павінен будзе прадставіць міграцыйным органам Грузіі дакумент, які пацвярджае наяўнасць не менш за два гады працоўнага стажу ў ІТ-сферы і даходу не менш за 25 тыс. долараў у эквіваленце.
Тэрмін ВНЖ для ІТ-спецыялістаў складзе тры гады з магчымасцю падаўжэння сумарна да 12 гадоў.
Пры гэтым від на жыхарства будзе ануляваны ў выпадку, калі яго ўладальнік будзе адсутнічаць у Грузіі на працягу 183 дзён у годзе альбо “больш за 183 дзён на працягу любых бесперапынных 12 каляндарных месяцаў”, гаворыцца ў дакуменце. Выключэнне прадугледжана для асоб, вымушаных пакінуць краіну з мэтай лячэння.
Папраўкі ўступяць у сілу з 1 верасня 2025 года. Да гэтага часу ўрад Грузіі павінна вызначыць канкрэтны пералік відаў дзейнасці, якія адносяцца да ІТ-сферы, зацвердзіць парадак прадастаўлення дакументаў на ВНЖ і правілы ажыццяўлення кантролю за знаходжаннем у краіне гэтай катэгорыі замежнікаў.
Тэрмін разгляду заяў, пададзеных на ВНЖ да 1 верасня 2026 года, не павінен перавышаць 90 дзён.
Цяпер першы від на жыхарства ў Грузіі выдаецца на тэрмін ад шасці месяцаў да аднаго года.
Грузія стала адной з асноўных краін, куды эмігравалі беларусы, якія асцерагаліся рэпрэсій на радзіме пасля няўдалых масавых акцый пратэсту супраць фальсіфікацыі вынікаў прэзідэнцкіх выбараў-2020 на карысць Аляксандра Лукашэнкі.
Паводле звестак МУС Грузіі, на 1 студзеня 2025 года ў краіне пражывала 12.808 імігрантаў з беларускім грамадзянствам. За апошнія чатыры гады ў Грузію прыехала 20.952 беларусы (11.005 мужчын, 9.947 жанчын), выехала — 8.144 (4.406, 3.738).
Улады краіны, якой кіруе партыя “Грузінская мара“ прарасійскага алігарха Бідзіны (Барыса) Іванішвілі, не задаволілі ніводнага хадайніцтва беларускіх грамадзян аб наданні прытулку. Аднак яны могуць бесперапынна знаходзіцца ў краіне на працягу года. Пасля гэтага, каб абнуліць тэрмін, неабходна выехаць на любы перыяд часу. Назад пускаюць не ўсіх. У зоне рызыкі перш за ўсё тыя, хто праяўляе публічную палітычную актыўнасць.
