Праваабаронца Кісляк просіць распачаць крымінальную справу за адмовы ў прытулку беларусам у Грузіі
14 чэрвеня, Позірк. У сувязі з масавымі адмовамі ў наданні грамадзянам Беларусі прытулку ў Грузіі беларускі праваабаронца Раман Кісляк звярнуўся да генеральнага пракурора і народнага абаронцы (амбудсмена) гэтай каўказскай краіны.
У звароце да генпракурора праваабаронца пазначыў, што лічыць “пракрыку адмовы ў наданні статусу ўцекача Міністэрствам унутраных спраў Грузіі ўсім грамадзянам Беларусі дыскрымінацыяй паводле прыкметы нацыянальнага паходжання і злачынствам, прадугледжаным артыкулам 1421 Крымінальнага кодэксу Грузіі (расавая дыскрымінацыя)”.
Кісляк просіць “правесці праверку па фактах адмовы грамадзянам Беларусі ў наданні прытулку”, а таксама “узбудзіць і расследаваць крымінальную справу” і “прыняць меры для спынення практыкі расавай дыскрымінацыі беларусаў у пытанні атрымання статусу ўцекача”.
“МУС і Дэпартамент міграцыі адмаўляюць усім беларусам у статусе ўцекачоў. Гэта носіць масавы характар. Па ўсім зваротам ідуць адмовы”, — канстатаваў Кісляк ў размове з “Позіркам”.
“Мы быццам бы нябачныя. Нашы праблемы не заўважаюць. Нам усім адмаўляюць. Мы лічым гэта дыскрымінацыяй. Ёсць злачынства, хай пракуратура расследуе, Офіс народнага абаронцы займаецца”, — сказаў праваабаронца.
У 2019–2024 гадах Грузія не задаволіла ніводнага хадайніцтва беларускіх грамадзян аб наданні прытулку.
