У Беларусі другі месяц запар фіксуецца запаволенне росту рознічнага тавараабароту

16 чэрвеня, Позірк. У студзені — траўні 2025 года рознічны тавараабарот склаў 31 млрд рублёў, павялічыўшыся на 9,3% у супастаўных цэнах да аналагічнага перыяду 2024-га, сведчаць даныя Нацыянальнага статыстычнага камітэта.

У студзені 2025-га рост складаў 12,5%, студзені — лютым — 10%, студзені — сакавіку — 10,8%, студзені — красавіку — 10%. Такім чынам, другі месяц запар назіраецца запаволенне росту.

У студзені 2024 года рознічны тавараабарот вырас на 9,9%, студзені — лютым і студзені — сакавіку — на 13%, студзені — красавіку — на 12,1%, студзені — траўні — на 12,2%, студзені — чэрвені — на 11,5%, студзені — ліпені — на 11,8%, студзені — жніўні — на 12%, са студзеня — верасня па студзень — снежань — па 11,8%.

Тавараабарот у сферы грамадскага харчавання за пяць месяцаў 2025-га вырас у гадавым выражэнні на 5% (у мінулым месяцы — на 4,8%) — да 2,8 млрд рублёў.

Рознічны тавараабарот арганізацый гандлю, на які прыпала 95,6% (за месяц не змяніўся) усяго рознічнага тавараабароту, вырас на 10,1% да 37,9 млрд рублёў (+10,8%).

Аптовы тавараабарот знізіўся на 4,7% да 72,2 млрд рублёў (-3,4%).

У траўні 2025 года ў Беларусі “працягнулася паскарэнне ўстойлівага кампанента росту цэн — базавай інфляцыі”, якая склала 7,1% (тут і далей у гадавым вымярэнні) пасля 6,6% ў красавіку, адзначыў Еўразійскі банк развіцця (ЕАБР) 16 чэрвеня ў сваім штотыднёвым аглядзе.

На думку аналітыкаў банка, гэта сведчыць пра тое, што “захоўваецца праінфляцыйны ціск з боку ўнутранага попыту, які падтрымліваецца ростам рэальных заробкаў і спажывецкага крэдытавання”.

Як паведамляў “Позірк”, спажывецкія цэны ў траўні 2025 года выраслі на 0,7%, ад пачатку года — на 4,5%, у гадавым вымярэнні — на 7,1%.

Міністэрства антыманапольнага рэгулявання і гандлю пастановай № 4 ад 27 студзеня 2025 года вызначыла паказчыкі штомесячнага (з нарастаннем) дапушчальнага павелічэння цэн: у студзені яны не павінны былі вырасці больш як на 0,7% (па факце — 0,7%), па выніках студзеня — лютага — на 1,9% (+2%), студзеня — сакавіка — на 2,2% (+2,8%), студзеня — красавіка — на 2,7% (+3,8%), студзеня — траўня — 3% (+4,5%).

Далей: студзень — чэрвень — 3,3%, студзень — ліпень і студзень — жнівень — 3,4%, студзень — верасень — 3,7%, студзень — кастрычнік — 4,1%, студзень — лістапад — 4,4%, студзень — снежань — 5%.