Гендырэктар “Белавія” анансаваў увядзенне ў працу другога самалёта Airbus A330-200

20 чэрвеня, Позірк. Авіякампанія “Белавія” адкрые далёкамагістральны напрамак пасля ўводу ў строй другога самалёта Airbus A330-200, заявіў у інтэрв’ю “Беларусь 1” гендырэктар перавозчыка Ігар Чаргінец.

Паводле яго, пакуль у строі знаходзіцца адзін згаданы самалёт, кампанія не выконвае такіх рэйсаў, бо “з улікам тэхнічнага абслугоўвання, калі самалёт павінен дзень ці два прастаяць на так званым чэку, складана будзе арганізаваць перавозку 280 пасажыраў без яшчэ аднаго Airbus A330-200”.

“Мы пакуль чакаем прыходу другога самалёта. Ён цяпер знаходзіцца на тэхнічным абслугоўванні. Цягам, я думаю, што недзе ў ліпені, можа быць, да сярэдзіны жніўня ён будзе гатовы, у працоўным стане. Тады з гэтага моманту мы адкрываем далёкамагістральны напрамак. Першы напрамак ужо запланаваны. Гэта з 2 верасня палёты ў Санью, востраў Хайнань, курорт Кітая. Далей мы якраз вядзем перамовы з шэрагам краін, аэрапортаў, пастаўшчыкоў паслуг. Гэта і В’етнам, і Тайланд, і іншыя краіны”, — праінфармаваў гендырэктар нацыянальнай авіякампаніі.

Таксама, паводле сцвярджэння Чаргінца, “Белавія” выкарыстоўвае для рамонту парку арыгінальныя запчасткі, нягледзячы на заходнія санкцыі, хаця яны абыходзяцца кампаніі ў некалькі разоў даражэй, чым раней.

“Белавія” паведаміла пра папаўненне свайго парку першым самалётам Airbus A330-200 6 чэрвеня.

Як адзначалася ў прэс-рэлізе авіяперавозчыка, гэта дазволіць яму “выконваць далёкамагістральныя рэйсы і адкрываць новыя маршруты”.

“Мы будзем выконваць прамыя беспасадачныя пералёты з Мінска на самыя вядомыя курорты Паўднёва-Усходняй Азіі, далёкі напрамак. Самалёт разлічаны на палёт да 12 тыс. км. Для параўнання: Boeing 737-8-Max разлічаны на 6,5 тыс. км палёту. Максімальная загрузка на A330 у нашым варыянце — 281 пасажыр”, — сказаў тады Чаргінец.

Перадгісторыя дастаўкі самалёта не была ўказана.

Аднак у сакавіку брытанскае інфармацыйнае агенцтва Reuters паведамляла, што “Белавія”, што знаходзіцца пад заходнімі санкцыямі, збіраецца “папоўніць свой флот трыма самалётамі Airbus A330, якія раней належалі гамбійскай авіякампаніі Magic Air”.

Як адзначалася, “усе тры барты, кожны ёмістасцю каля 250 пасажыраў, былі зарэгістраваны на кампанію Magic Air на момант прызямлення ў Мінску 17 жніўня 2024 года”.

Паводле даных рэестра кампаній Міністэрства юстыцыі Гамбіі, Magic Air, у якой няма нават сайта ў інтэрнэце, з’яўляецца “малавядомай прыватнай кампаніяй, якая займаецца лізінгам самалётаў і авіяперавозкамі”, гаварылася ў матэрыяле.

Галіновае выданне Aviation Week паведаміла ў жніўні 2024 года, што Magic Air адправіла ў Беларусь самалёты з Каіра (Егіпет), Стамбула (Турцыя) і Маската (Аман).

Паводле слоў двух крыніц агенцтва, запуск лайнераў у эксплуатацыю ў Беларусі ідзе марудна, бо “яны прыбылі ў дрэнным стане”. Адзін з іх апісаў інтэр’ер самалёта як “абдзёрты”.

23 траўня 2021 года ў выніку дзеянняў беларускіх уладаў у мінскім аэрапорце здзейсніў вымушаную пасадку самалёт ірландскай авіякампаніі Ryanair, які ляцеў з Афін у Вільнюс. На борце знаходзіліся на той момант апазіцыйны блогер Раман Пратасевіч і ягоная сяброўка, расіянка Соф’я Сапега. Яны былі затрыманыя, асуджаныя, але пазней памілаваныя.

Пасля інцыдэнту беларускай нацыянальнай авіякампаніі “Белавія” забаронена лётаць у краіны Еўрасаюза. 2 снежня 2021 года Вялікабрытанія, Канада, ЗША і ЕС скаардынавана ўхвалілі чарговыя санкцыі ў дачыненні да шэрагу беларускіх фізічных асоб і арганізацый. Як было адзначана ў сумеснай заяве з гэтай нагоды, санкцыйныя меры прыняты “ў адказ на напады на правы чалавека і асноўныя свабоды ў Беларусі, якія працягваюцца, ігнараванне міжнародных нормаў і шматразовыя акты рэпрэсій”. Сярод арганізацый, што трапілі ў “чорны спіс”, значылася і “Белавія”.

2 сакавіка 2022 года, неўзабаве пасля пачатку поўнамаштабнага расійскага ваеннага ўварвання ва Украіну, ЗША ўвялі ў дачыненні да “Белавія” абмежаванні, якія тычацца экспарту прадукцыі авіяцыйнай сферы і ліцэнзавання пэўных самалётаў і запчастак. З 7 снежня 2023 года яны былі падоўжаныя яшчэ на 180 дзён.

9 жніўня 2023 года “Белавія” была дададзена да санкцыйных спісаў ЗША.

3 лістапада 2023 года генеральны дырэктар кампаніі Ігар Чаргінец на прэс-канферэнцыі ў Мінску прызнаў, што планы па мадэрнізацыі флоту самалётаў авіякампаніі “Белавія” былі парушаныя праз увядзенне заходніх санкцый.

29 траўня 2024 года Еўрапейскі суд агульнай юрысдыкцыі пакінуў дзейнымі санкцыі Еўрасаюза, уведзеныя супраць “Белавія”, адхіліўшы адпаведны пазоў беларускай авіякампаніі.