За тыдзень беларускім бязвізам скарысталася амаль 6,5 тыс. еўрапейцаў — Дзяржпагранкамітэт

23 чэрвеня, Позірк. З 16 па 23 чэрвеня Беларусь у бязвізавым парадку наведала 6.450 жыхароў дзяржаў Еўропы (9–16 чэрвеня — 5.136), вынікае са звестак Дзяржаўнага памежнага камітэта.

За тыдзень у краіну прайшло 1.970 грамадзян Літвы (1.845), 2.837 грамадзян і неграмадзян Латвіі (1.743), 577 грамадзян Польшчы (517), а таксама прадстаўнікі іншых еўрапейскіх дзяржаў — 1.066 (1.031).

Усяго з 15 красавіка 2022 года Беларусь па бязвізе наведала 1.132.616 жыхароў Еўропы. З Латвіі прыбыло 358.511 замежнікаў, з Літвы — 627.403, з Польшчы — 115.232.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы. 19 ліпеня 2024 года беларускія ўлады распаўсюдзілі бязвізавы рэжым на грамадзян яшчэ 35 краін Еўропы, ім за гэты час скарысталася 31.470 чалавек.

Гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі. Большасць гэтых краін рэжым Лукашэнкі лічыць “недружалюбнымі” за тое, што ўвялі санкцыі альбо далучыліся да іх.

Грамадзяне гэтых дзяржаў могуць уязджаць у Беларусь без візы праз усе наземныя і паветраныя міжнародныя пункты пропуску “на падставе сапраўдных дакументаў”, знаходзіцца на беларускай тэрыторыі “не больш за 30 сутак з дня ўезду”.

13 снежня 2024 года бязвіз для жыхароў 38 еўрапейскіх краін падоўжаны да канца 2025-га.