У БДТУ пачнуць навучаць праектаванню беспілотнікаў
1 ліпеня, Позірк. Набор студэнтаў на дзве новыя спецыяльнасці анансаваў міністр адукацыі Андрэй Іванец 1 ліпеня ў Магілёве падчас супольнага пасяджэння калегій адукацыйных ведамстваў Беларусі і Расіі.
Паводле слоў чыноўніка, якога цытуе прэс-служба Мінадукацыі, набор на навучанне пачнецца “з гэтага года”, ідзе гаворка пра спецыяльнасці, якіх “раней у Беларусі не было”.
“Гэта праектаванне беспілотных лятальных апаратаў і стварэнне энерганасычаных матэрыялаў на базе Беларускага дзяржаўнага тэхналагічнага ўніверсітэта (БДТУ)”, — сказаў Іванец.
З расійскага боку, дадаў ён, вызначаны “партнёр” для навучання па названых спецыяльнасцях — Казанскі федэральны ўніверсітэт.
“Гэта вельмі важны кірунак для забеспячэння абараназдольнасці нашай краіны. Гэта тыя ўнікальныя спецыялісты, якія патрэбныя для працы ў адпаведных галінах Саюзнай дзяржавы”, — заявіў міністр.
Навучанне новым спецыяльнасцям будзе рэалізавана ў межах “развіцця сеткавага ўніверсітэта Саюзнай дзяржавы, канцэпцыя якога на цяперашні час распрацавана”, адзначыў кіраўнік ведамства.
Стварэнне згаданага “сеткавага ўніверсітэта” было анансавана ў студзені 2024 года на форуме “Прамысловы дыялог: Расія — Рэспубліка Беларусь” у Екацярынбургу.
Дзяржсакратар Саюзнай дзяржавы Дзмітрый Мезенцаў (пакінуў пасаду 17 сёлета красавіка) тады заявіў пра неабходнасць “уважліва разгледзець прапанову пра стварэнне ўніверсітэта высокіх тэхналогій Саюзнай дзяржавы з размяшчэннем яго ў беларускай сталіцы”.
5 лістапада 2024 года прэм’ер-міністр РФ Міхаіл Мішусцін падпісаў пастанову “Аб ходзе стварэння Сеткавага ўніверсітэта высокіх тэхналогій Саюзнай дзяржавы”. Паводле дакумента, “апорнымі пунктамі” праекта сталі Казанскі федэральны ўніверсітэт і Беларускі дзяржаўны тэхналагічны ўніверсітэт.
“Мы пераходзім да практычнай рэалізацыі стратэгіі навукова-тэхналагічнага развіцця Саюзнай дзяржавы. Працягнем стварэнне Сеткавага ўніверсітэта высокіх тэхналогій Саюзнай дзяржавы. Ён будзе арыентаваны на падрыхтоўку кадраў, якія запатрабаваныя нашымі эканомікамі”, — сказаў Міхаіл Мішусцін.
6 сакавіка паведамлялася, што Расія прапанавала стварыць у Беларусі “завод па вытворчасці беспілотных авіяцыйных сістэм магутнасцю да 100 тыс. адзінак штогод”. Лукашэнка падтрымаў прапанову РФ.
4 сакавіка, звяртаючыся да новапрызначанага намесніка віцэ-прэм’ера Віктара Каранкевіча, які курыруе прамысловы сектар, Лукашэнка звярнуў яго ўвагу на ўсё большы попыт на БПЛА і боепрыпасы.
24 верасня 2024 года на нарадзе з вайскоўцамі на Абуз-Лясноўскім агульнавайсковым палігоне (Брэсцкая вобласць) Лукашэнка заявіў пра неабходнасць рыхтавацца да вайны. Беспілотную авіяцыю пры гэтым ён назваў “сур’ёзнай навінкай”.
29 верасня намеснік дырэктара па вучэбнай рабоце ДТСААФ Сяргей Петрусёў паведаміў, што ў 2026 годзе ў ДТСААФ (Добраахвотнае таварыства садзейнічання арміі, авіяцыі і флоту) плануюць рыхтаваць аператараў БПЛА для сілавых структур.
7 кастрычніка на арганізаванай Мінабароны нарадзе з рэктарамі ўстаноў вышэйшай адукацыі абмяркоўвалася падрыхтоўка аператараў беспілотных лятальных апаратаў, у тым ліку стварэнне спецыялізаванай кафедры ў Ваеннай акадэміі.
15 лістапада начальнік упраўлення прымянення і развіцця беспілотных авіяцыйных комплексаў Узброеных сіл Міхаіл Бранскі сцвярджаў, што ў Беларусі “паспяхова вырашылі праблему з ударнымі БПЛА”. Паводле яго слоў, у 2024 годзе ВС “шчыльна працавалі” з прадпрыемствамі Дзяржкамваенпрама, значная колькасць узораў, якія распрацоўваюцца па заказе войска беларускімі прадпрыемствамі, “ўжо прынята на ўзбраенне”.
Паведамлялася, што па выніках праведзеных выпрабаванняў у 2025 годзе УС будуць мець “шырокую лінейку ўдарных беспілотнікаў”: “Чэкан-В” з далёкасцю палёту да 30 кіламетраў, “Міратворац” і іншыя распрацоўкі.
Кіраўнік Генштаба Муравейка паведаміў пра стварэнне беспілотных войскаў у складзе УС
13 чэрвеня, Позірк. У структуры Узброеных сіл "у якасці самастойнага кампанента" створаныя "войскі беспілотных авіяцыйных комплексаў", паведаміў начальнік Генеральнага штаба УС — першы намеснік міністра абароны Павел Муравейка. 13 чэрвеня ён выступіў перад Аляксандрам Лукашэнкам у Цэнтры падрыхтоўкі і прымянення …
