СК: Пажар, на якім загінулі бабуля і ўнучка, адбыўся з-за падпалу

7 ліпеня, Позірк. Па факце пажару ў вёсцы Культура (Пухавіцкі раён Мінскай вобласці), у якім 5 ліпеня загінулі бабуля і ўнучка, узбуджана крымінальная справа, паведаміў Следчы камітэт (СК).

Следча-аператыўная група, якая працавала на месцы здарэння, з прыцягненнем супрацоўнікаў МНС устанавіла, што пажар узнік у выніку падпалу, гаворыцца ў рэлізе.

Пухавіцкім раённым аддзелам СК узбуджана крымінальная справа паводле ч. 3 арт. 218 (знішчэнне або пашкоджанне маёмасці, учыненае агульнанебяспечным спосабам, што прывяло па неасцярожнасці да смерці чалавека) Крымінальнага кодэкса.

Следчыя “ўстанаўліваюць абставіны здарэння і асоб, якія маюць дачыненне да падпалу”.

Раней паведамлялася, што 5 ліпеня ў 23:06 у МНС паступіла паведамленне аб пажары ў будынку, узведзеным “для пражывання на час будаўніцтва жылога дома”. На месцы здарэння супрацоўнікі МНС знайшлі двух загінуўшых — дачку гаспадара дома (2013 года нараджэння) і яго маці (1950 г.н.).