Дэпутат Сейма Літвы Сініца паскардзіўся на Ціханоўскага ў пракуратуру

25 ліпеня, Позірк. З просьбай ацаніць, ці не парушаюць заявы прадстаўніка беларускай апазіцыі Сяргея Ціханоўскага аб магчымасці стварэння беларускіх аўтаномных “астравоў” на тэрыторыі Літвы палажэнні Крымінальнага кодэкса, дэпутат Сейма Літвы Вітаўтас Сініца звярнуўся ў Генеральную пракуратуру краіны, паведамляе Lietuvos rytas са спасылкай на агенцтва ELTA.

“Ціханоўскія не асуджаюць ліцвінізм, яны запрашаюць Сейм да сумеснага пошуку гістарычнай праўды пра Вялікае княства Літоўскае, быццам Літва яе яшчэ не знайшла, прысвойваюць сімвал “Віціса” (“Пагоні”. — “Позірк”.) для свайго псеўдапашпарта, крытыкуюць абмежаванні міграцыйнай палітыкі і, нарэшце, гавораць пра “астравы”, — гаворыцца ў звароце.

Паводле яго, на фоне вайны ва Украіне, што працягваецца, “да падобных прапаноў неабходна ставіцца крайне сур’ёзна”, паколькі, як сцвярджае дэпутат, “менавіта з такіх дзеянняў пачыналася агрэсія Расіі супраць Украіны”.

“Сам С. Ціханоўскі нядаўна публічна захапляўся анексіяй Крыма Расіяй (цытата не прыведзеная, — “Позірк”.) Тут няма ніякіх апраўданняў, і гэта нават не двухсэнсоўна. У Літве ўжо даўно развіваецца свайго роду альтэрнатыўная Беларусь у выгнанні, але С. Ціханоўскі — адзіны, хто настолькі безразважна і адкрыта пра гэта заявіў”, — упэўнены дэпутат.

Паводле Сініцы, заканадаўства Літвы прадугледжвае крымінальную адказнасць для тых, хто “ўдзельнічаў у дзейнасці групы, мэтай якой з’яўляецца незаконнае змяненне канстытуцыйнага ладу Літоўскай дзяржавы, замах на яе незалежнасць і парушэнне цэласнасці яе тэрыторыі”.

Палітык таксама адзначае, што Канстытуцыя Літвы забараняе стварэнне якіх-небудзь аўтаномных рэгіёнаў. Паводле яго слоў, падобныя публічныя заклікі патэнцыйна з’яўляюцца замахам на тэрытарыяльную цэласнасць.

22 ліпеня Сініца прыводзіў падобныя довады ў сваім лісце на імя міністра замежных спраў Літвы Кястуціса Будрыса, у якім прасіў скасаваць акрэдытацыю, выдадзеную 5 ліпеня 2021 года “Прадстаўніцтву беларускай дэмакратыі” (дэ-факта — Офісу Святланы Ціханоўскай).

23 ліпеня на сайце Ціханоўскай было апублікаванае паведамленне ў сувязі з ініцыятывай Сініцы з абвяржэннем выкладзеных літоўскім дэпутатам сцвярджэнняў.

Пазней у той жа дзень стала вядома, што Будрыс не бачыць падстаў разглядаць пытанне аб ануляванні акрэдытацыі беларускага прадстаўніцтва.

Сініца з’яўляецца заснавальнікам і лідарам літоўскай нацыяналістычнай кансерватыўнай партыі “Нацыянальнае аб’яднанне”. Абраны ў Сейм па аднамандатнай акрузе і з’яўляецца адзіным дэпутатам ад згаданай партыі.

У інтэрв’ю ютуб-каналу “Жыццё-маліна”, апублікаваным 6 ліпеня, Ціханоўскі сказаў: “Я хачу жыць у Беларусі. У турме я шмат пра гэта думаў. Калі беларусы не захочуць змагацца, не захочуць верыць у мяне, няхай вераць у кагосьці іншага, але галоўнае — каб яны змагаліся. І галоўнае, каб гэта прывяло да выніку”.

Ён дадаў: “Я пачну тут будаваць астравы такія, як у немцаў у Расіі была нямецкая аўтаномная акруга, або яўрэйская. Краіна ж — гэта людзі”.

Рэагуючы на гэтыя словы, прэзідэнт Гітанас Наўседа 22 ліпеня заклікаў зразумець і пастарацца ацаніць цвяроза сітуацыю Ціханоўскага, які “шмат гадоў правёў у цёмнай турме”.